2025-ci il Azərbaycan milli mətbuatı üçün əlamətdar bir tarixdir. Bu il Azərbaycan milli mətbuatının yaranmasının 150 illiyi tamam olur. Bu mühüm hadisə təkcə jurnalistika tariximiz üçün deyil, ümumilikdə xalqımızın mədəni və ictimai inkişafı baxımından xüsusi əhəmiyyət kəsb edir. Mətbuat xalqın səsi, milli mənəviyyatın aynası, azad düşüncənin tribunasına çevrilmişdir.
Azərbaycan milli mətbuatının təməli 22 iyul 1875-ci ildə Həsən bəy Zərdabinin redaktorluğu ilə nəşr olunan “Əkinçi” qəzeti ilə qoyulmuşdur. Bu qəzet təkcə ilk azərbaycandilli qəzet deyil, həm də maarifçilik, milli oyanış və ictimai fikir tariximizdə yeni bir dövrün başlanğıcı olmuşdur. “Əkinçi” sadəcə xəbərlər vermir, xalqı elmlə, mədəniyyətlə tanış edir, cəhalətə qarşı mübarizə aparırdı.
Sonrakı illərdə “Ziya”, “Kəşkül”, “Şərqi-Rus”, “Molla Nəsrəddin” kimi mətbu orqanlar da ictimai fikrin formalaşmasında, xalqın maariflənməsində mühüm rol oynadılar. Xüsusilə “Molla Nəsrəddin” satirik jurnal olaraq dövrün problemlərini cəsarətlə gündəmə gətirir, sosial ədalətsizliyi tənqid edirdi.
Azərbaycan Xalq Cümhuriyyəti dövründə mətbuat daha da inkişaf etdi və dövlətçiliyin təbliğinə xidmət etdi. Sovet dövründə mətbuat müəyyən məhdudiyyətlərə baxmayaraq, milli ruhun yaşadılması üçün vasitə oldu. 1991-ci ildən sonra, müstəqillik qazanıldıqdan sonra isə mətbuat azadlığı və müxtəlifliyi baxımından yeni mərhələyə qədəm qoydu.
Azərbaycan dövləti mətbuatın inkişafına daim diqqət ayırmış, jurnalistlərin fəaliyyəti üçün hüquqi və maddi əsaslar yaratmışdır. Ümummilli lider Heydər Əliyev mətbuatın gücünü yüksək qiymətləndirərək onun inkişafını milli siyasətin əsas istiqamətlərindən biri kimi müəyyən etmişdir. Hazırda da Prezident İlham Əliyevin rəhbərliyi ilə mətbuat sahəsində islahatlar aparılır, jurnalistlərin sosial rifahı üçün addımlar atılır
Azərbaycan milli mətbuatının 150 illiyi ölkə üzrə geniş şəkildə qeyd olunur. Tədbirlər, konfranslar, müsabiqələr, sərgilər vasitəsilə bu tarixi hadisə həm peşəkar jurnalistlər, həm də gənc nəsil üçün təbliğ olunur. Bu yubiley yalnız keçmişə ehtiram deyil, eyni zamanda gələcəyə baxış, mətbuatın gələcək inkişaf yoluna verilən dəyərdir.
Azərbaycan milli mətbuatı 150 illik tarixi ərzində böyük inkişaf yolu keçmiş, xalqın maariflənməsində, milli ideologiyanın formalaşmasında və cəmiyyətin tərəqqisində əvəzsiz rol oynamışdır. Bu yubiley bizə həm keçmişə nəzər salmaq, həm də mətbuatın gələcək vəzifələrini dəyərləndirmək imkanı verir.
Balaxanı qəsəbəsi, Mirzə Ələkbər Sabir adına 259 nömrəli tam orta ümumtəhsil məktəbi publik hüquqi şəxsi
ibtidai sinif müəllimi Nəcəfli Leyla