4 oktyabr Azərbaycan xalqının yaddaşında unudulmaz bir tarixdir. Bu gün Cəbrayıl şəhərinin işğaldan azad olunması ilə bağlıdır. Uzun illər həsrət çəkdiyimiz doğma yurd yerlərimizin azadlığı xəbəri xalqımıza böyük sevinc bəxş etdi. Bu tarix yalnız Cəbrayıl camaatı üçün deyil, bütün Azərbaycan üçün qürur və fəxarət günüdür.
4 oktyabr təkcə Cəbrayıl şəhərinin azad olunması tarixi deyil, həm də dövlətimiz tərəfindən rəsmi olaraq “Cəbrayıl Şəhəri Günü” elan edilib. Prezident İlham Əliyev 31 iyul 2023-cü ildə imzaladığı sərəncamla bu günün rəsmiləşdirilməsini təmin etdi. Bu, həm Cəbrayıl sakinləri, həm də bütün Azərbaycan xalqı üçün böyük mənəvi hadisədir.
1993-cü ildən etibarən Ermənistan silahlı qüvvələrinin işğalı altında olan Cəbrayıl rayonu və onun mərkəzi şəhəri 27 ildən çox müddətdə viran qaldı. Daş üstündə daş qoyulmadı, evlər yandırıldı, məktəblər, xəstəxanalar, məscidlər dağıdıldı. Lakin bütün bu dağıntılar xalqımızın iradəsini sarsıda bilmədi. Azərbaycan xalqı daim doğma torpaqlarına qayıdacağına inanırdı. Nəhayət, 2020-ci ildə 44 günlük Vətən müharibəsi xalqımızın qəhrəmanlıq salnaməsinə çevrildi və 4 oktyabrda Cəbrayıl şəhəri işğaldan azad edildi. 4 Oktyabr – Cəbrayıl Şəhəri Günü həm də gələcəyə inamın təcəssümüdür. Bu gün, şəhidlərimizin qanı bahasına qazanılmış ədalətin qələbəsini xatırlamaqla yanaşı, Azərbaycanın işğal altındakı bütün əraziləri dirçəltmək qətiyyətini nümayiş etdirir. Cəbrayıl bu gün yalnız bir qələbə simvolu deyil, həm də sülh, bərpa və inkişafın mərkəzinə çevrilməkdədir. Bu tarixi hadisə bir daha sübut etdi ki, Azərbaycan xalqı öz ərazi bütövlüyünü bərpa etmək gücünə və iradəsinə malikdir. Cəbrayılın azadlığı Vətən Müharibəsi Zəfərinin unudulmaz və təməl daşlarından biridir.
Azərbaycan Ordusunun igidliyi, şəhidlərimizin qanı, qazilərimizin fədakarlığı nəticəsində bu torpaqlara qələbə yolu açıldı. Ali Baş Komandan İlham Əliyevin qətiyyətli rəhbərliyi ilə xalq-ordu birliyi öz bəhrəsini verdi. Cəbrayılın azad olunması müharibənin gedişində mühüm bir dönüş nöqtəsi oldu və digər torpaqlarımızın azadlığı üçün zəmin yaratdı.
Cəbrayıl tarixən Azərbaycanın ən qədim yaşayış məskənlərindən biridir. Bu torpaqlar zəngin mədəniyyət nümunələri, qədim abidələri, gözəl təbiəti ilə seçilib. Cəbrayıl həm də çalışqan və zəhmətsevər insanları ilə tanınıb. İşğal illərində bu dəyərlərin çoxu məhv edilsə də, cəbrayıllılar öz köklərinə sadiq qaldılar, Vətən sevgisini qəlblərində qorudular.
İşğaldan azadlıq xəbəri cəbrayıllılar üçün sadəcə sevincli an deyildi, həm də onların həyatına yeni bir ümid gətirdi. Çünki artıq doğma yurdlarına qayıtmaq, dağıdılmış evlərini yenidən tikmək, torpaqlarında əkin-biçinlə məşğul olmaq imkanları yaranmışdı. 2020-ci ildən sonra dövlətimiz Cəbrayılın bərpası üçün böyük layihələrə start verdi. Yeni yollar, elektrik xətləri, qaz təchizatı, su şəbəkələri çəkildi. Azad edilmiş ərazilərdə “ağıllı kənd” və “ağıllı şəhər” layihələri icra olunur. Bu layihələr müasir standartlara uyğun, ekoloji cəhətdən təmiz və dayanıqlı inkişaf modelinə əsaslanır.
Cəbrayıl şəhərinin bugünkü dirçəlişi təkcə iqtisadi tərəqqi demək deyil. Bu həm də milli qürurun, Vətən sevgisinin təntənəsidir. Hər bir azərbaycanlı üçün Cəbrayılın azadlığı, ora edilən qayıdış böyük bir mənəvi zəfərdir. Bu torpaqlar artıq azadlıqla nəfəs alır, orada yeni həyat başlayır.
4 oktyabr tarixində biz yalnız qələbəni qeyd etmirik, həm də şəhidlərimizi ehtiramla anırıq. Bu torpaqlar onların qanı bahasına azad olunub. Qazilərimizin göstərdiyi şücaət, xalqımızın birlik və həmrəyliyi gələcək nəsillərə örnək olacaq. Bu gün Cəbrayıl şəhəri Azərbaycanın qəhrəmanlıq rəmzlərindən biridir.
Cəbrayılın azad olunması ilə xalqımız bir daha sübut etdi ki, heç bir qüvvə Azərbaycanı öz torpaqlarından ayıra bilməz. Torpaq itirilə bilər, amma heç vaxt unudulmaz. Tarix də göstərdi ki, xalqın iradəsi, dövlətin gücü və ordunun qəhrəmanlığı birləşəndə bütün itirilmiş dəyərlər geri qaytarıla bilər.
Bu gün Cəbrayıl artıq yeni həyat mərhələsinə qədəm qoyur. Bərpa olunan şəhər, qurulan yeni evlər, salınan parklar, açılan məktəblər gələcəyin güclü və firavan Cəbrayılını formalaşdırır. Uşaqlar yenidən doğma torpaqlarında böyüyəcək, yeni nəsillər Vətən sevgisi ilə tərbiyə olunacaq.
4 oktyabr təkcə Cəbrayıl şəhəri günü deyil, həm də bütün Azərbaycan üçün birlik, iradə və qələbə günüdür. Bu tarix bizə həm keçmişi xatırladır, həm də gələcəyə inamla baxmaq gücü verir.
Prezident İlham Əliyevin çıxışında qeyd etdiyi kimi: “Biz bu torpaqlara əbədi qayıtmışıq. Burada yeni həyat quracağıq, daha gözəl, daha müasir Cəbrayıl yaradacağıq. Heç kim bizi bu torpaqlardan ayıra bilməz.” Bu fikirlər azad olunmuş torpaqların gələcək inkişafının dövlət siyasətinin əsas istiqamətlərindən biri olduğunu bir daha sübut edir.

Pirşağı qəsəbəsi, 112 nömrəli tam orta məktəbin
ingilis dili müəllimi Əzizə Rzayeva