Azərbaycan xalqı Müzəffər Ali Baş Komandan, cənab Prezident İlham Əliyevin rəhbərliyi ilə böyük tarixi Qələbə əldə edərək uzun illər işğal altında qalmış torpaqlarını azad etmişdir. Bu möhtəşəm Zəfər bölgədə tamamilə yeni siyasi və strateji vəziyyət yaratmışdır. Artıq beynəlxalq aləm və dünya birliyi bu dəyişən şəraiti qəbul etmiş və Azərbaycanın haqlı mövqeyini təsdiqləmişdir. Bu hadisə dövlətimizin tarixində mühüm dönüş nöqtəsi kimi dəyərləndirilir.
25 avqust 2023-cü ildə cənab Prezident İlham Əliyevin Kəlbəcərə səfəri də bu həqiqətlərin təsdiqi oldu. Səfər çərçivəsində dövlət başçısı Kəlbəcərdə “Soyuqbulaq” Kiçik Su Elektrik Stansiyasının açılışında iştirak etmiş, həmçinin “İstisu” mineral sudoldurma zavodunun tikintisi və “İstisu” Müalicə-İstirahət Kompleksində görülən işlərlə tanış olmuşdur. Bu layihələr bölgənin iqtisadi inkişafına, turizm imkanlarının genişlənməsinə və yeni iş yerlərinin açılmasına xidmət edir.
Cənab Prezident İlham Əliyev həmçinin Kəlbəcərdə “AzərEnerji” Açıq Səhmdar Cəmiyyətinin “Çıraq-1” və “Çıraq-2” Kiçik Su Elektrik Stansiyalarının açılışında iştirak etmişdir. Bu stansiyalar Azərbaycanın enerji təhlükəsizliyinin möhkəmlənməsinə və ekoloji cəhətdən təmiz enerji istehsalının artırılmasına mühüm töhfə verir.
Səfərin ən önəmli hadisələrindən biri isə Kəlbəcər rayonunda Zar kəndinin təməlqoyma mərasimi olmuşdur. Bu hadisə Böyük Qayıdışın canlı sübutudur və məcburi köçkünlərin doğma torpaqlarına tezliklə qayıdacağının göstəricisidir.
Cənab Prezident İlham Əliyevin rəhbərliyi ilə həyata keçirilən bütün bu işlər Ulu Öndər Heydər Əliyevin müəyyənləşdirdiyi dövlətçilik strategiyasının uğurlu davamıdır. Ulu Öndərin qoyduğu möhkəm təməl bu gün Azərbaycanın qüdrətli dövlətə çevrilməsini təmin etmişdir.
Beləliklə, cənab Prezident İlham Əliyevin Kəlbəcərə səfəri tarixi Qələbəmizin nəticələrinin möhkəmlənməsinin, yeni şəraitin qəbul edilməsinin və azad olunmuş ərazilərdə həyatın sürətlə bərpa olunmasının parlaq göstəricisidir.
Ramana qəsəbəsi, 198 nömrəli tam orta məktəbin
coğrafiya müəllimi Nərminə Şirinova
