Azərbaycan və NATO artıq 30 ili adlayan bir zaman kəsiyi ərzində uğurlu danışıqlar və konstruktiv öhdəliklərlə yadda qalan möhkəm tərəfdaşlıq əlaqələri qurublar. Cənab Prezident İlham Əliyevin bu yaxınlarda verdiyi bəyanatda bu münasibətlərin səmərəli və əhəmiyyətli xarakterindən söhbət açılır. Belə ki, Azərbaycanın həm Kosovo, həm də Əfqanıstanda sülhməramlı missiyalarda fəal iştirakı vurğulanır və bu, ölkəmizin hərbi təcrübəsinə, beynəlxalq sferada nüfuzuna müsbət mənada mühim töhfə verir. Azərbaycanın Əfqanıstanda oynadığı vacib rol xüsusilə diqqətəlayiqdir, çünki hərbçilərimiz 2021-ci ilin avqustunda ölkədən çıxarılan sonuncu müttəfiq qüvvələr olub ki, bu da ölkəmizin NATO ilə əməkdaşlığa sadiqliyini nümayiş etdirir.Bundan başqa, Azərbaycanın Silahlı Qüvvələrinin müasirləşdirilməsi və müdafiə qabiliyyətinin artırılması istiqamətində davamlı səyləri müsbət nəticələr verib və bu da, ölkəmizin Ali Baş Komandanı İlham Əliyevin təhlükəsizlik standartlarına və bu sahədə peşəkarlığa göstərdiyi yüksək diqqətin təcəssümüdür.
2020-ci ildə “44 günlük müharibə” çərçivəsində Dağlıq Qarabağ münaqişəsinin hərbi və siyasi yolla həlli Azərbaycanın öz ərazi bütövlüyünü bərpa etmək əzminin sübutu kimi Azərbaycan torpaqlarının Ermənistan tərəfindən işğalı ilə bağlı müzakirələrə faktiki son qoydu.Hazırda Azərbaycan Ermənistanla fəal şəkildə sülh danışıqları aparmağa cəhd edir, regional sabitliyin və sülhün təmin edilməsinə fəal yanaşmasını nümayiş etdirir. Azərbaycan və Ermənistan rəsmiləri arasında sülh sazişi ilə bağlı tez-tez fikir mübadiləsi aparılması məsələlərin dinc yolla həlli istiqamətində ciddi irəliləyişin olduğunu göstərir. Eyni zamanda xarici siyasətdə doğru yolu izləyən dövlətimizin regional təhlükəsizlik və sabitliyin təşviqindəki fəal rolu Azərbaycana Cənubi Qafqaz regionunda həlledici tərəfdaş kimi baxan NATO-ya üzv ölkələr tərəfindən dəfələrlə beynəlxalq arenalarda etiraf edilmişdir. Ölkəmizin Avropa və Asiya arasında keçid qapısı kimi geo-siyasi əhəmiyyəti onun regional sülh və təhlükəsizliyin təmin edilməsində NATO ilə tərəfdaşlığının əhəmiyyətini daha da vurğulayır. Azərbaycanın NATO-nun dəyərlərinə və prinsiplərinə sadiqliyi təkcə onun hərbi töhfələri ilə deyil, həm də demokratik islahatlara dəstəyi və insan hüquqlarına hörməti ilə aydın görünür.
Bundan əlavə, Azərbaycanın NATO ilə stratejik tərəfdaşlığı təhlükəsizlik sahəsində əməkdaşlıqdan kənara çıxaraq enerji əməkdaşlığını da əhatə edir və Azərbaycan altısı NATO üzvü olmaqla ümumilikdə səkkiz ölkəyə etibarlı qaz təchizatçısı kimi xidmət edir. Avropa Komissiyasının Azərbaycanı etibarlı tərəfdaş və ümumavropa qaz təchizatçısı kimi tanıması ölkənin regional enerji dinamikasındakı əhəmiyyətinin carçısıdır. Bunlarla da kifayətlənməyən ölkəmiz Qlobal tendensiyalara uyğun olaraq, öz tərəfdaşları ilə əməkdaşlıq edib enerji portfelini daha da şaxələndirərək bərpa olunan enerji mənbələrinə sərmayə qoyur.
Azərbaycanın 1992-ci ildə Şimali Atlantika Əməkdaşlıq Şurası vasitəsilə NATO ilə ilk qarşılıqlı əlaqəsindən bəri tərəfdaşlıq əhəmiyyətli dərəcədə inkişaf edib və Azərbaycanın 1994-cü ildə NATO-nun Sülh Naminə Tərəfdaşlıq (SNT) proqramına qoşulması ilə bu əlaqələr xeyli möhkəmlənib.Geridə qalan illər ərzində Azərbaycan NATO-nun müxtəlif təşəbbüslərində,həyata keçirdiyi layihələrində, o cümlədən sülhməramlı əməliyyatlar, hərbi təlimlər və terrorla mübarizə sahəsində gördüyü tədbirlərdə fəal iştirak etməklə Avro-atlantik tərəfdaşlığına öz sadiqliyini nümayiş etdirmişdir. Birgə layihələr və təlim proqramları vasitəsilə Azərbaycan müdafiə və təhlükəsizlik təcrübələrini NATO standartlarına uyğunlaşdırmaqda davam edir, qarşılıqlı fəaliyyət və potensialın yaradılmasını asanlaşdırır. Azərbaycanın NATO ilə əməkdaşlığı hərbi tərəfdaşlıqdan kənara çıxaraq, Sülh və Təhlükəsizlik Naminə Elm (STE) proqramı kimi NATO-nun rəhbərlik etdiyi layihələrdə fəal iştirak edərək mülki müdafiə, təbii fəlakətlərin idarə edilməsi və ətraf mühitin mühafizəsi təşəbbüslərini əhatə edir və təhlükəsizliyə vahid yanaşma nümayiş etdirir. Daha sonra, Azərbaycanın COP29-a ev sahibliyi edən ölkə kimi yekdilliklə seçilməsi onun yaşıl təşəbbüslərinin təşviqi və davamlı inkişafa keçid istiqamətində səylərini beynəlxalq səviyyədə bütün dünyaya əks etdirir.
2006-cı ildə Bakıda Avro-Atlantik Mərkəzin yaradılması Azərbaycanın NATO ilə rabitə əlaqələrini daha da möhkəmləndirmiş, informasiya mübadiləsi və əməkdaşlıq mərkəzi rolunu oynamışdır. Hal-hazırda ölkə prezidenti Cənab İlham Əliyev NATO ilə əməkdaşlığı gücləndirməkdə davam edərək, 21-ci əsrdə təhlükəsizlik təhdidlərinin inkişaf edən xarakterini əks etdirən kibertəhlükəsizlik, terrorla mübarizə kimi sahələrdə əməkdaşlığın yeni yollarını araşdırmağa hazırdır.
Yekun olaraq, Azərbaycan və NATO arasında möhkəm dostluq təkcə ortaq strateji maraqlara deyil, həm də xalqların ümumi çağırışlarına diqqət etmək və gələcək nəsillərə daha parlaq gələcək qurmaq üçün əməkdaşlıq etdiyi sülhsevər və firavan Avro-Atlantik icmasının ümumi baxışına əsaslanır.


Sabunçu qəsəbəsi, 215 nömrəli tam orta məktəbin
müəllimi Aygün Hüseynova