27 sentyabr Azərbaycan tarixində yeni dövrün başlanğıcı kimi qalacaq. Bir müddət sonra biz tarixi dövrdə yaşadığımızı, bu dövrə şahidlik etdiyimizi daha yaxşı dərk edəcəyik. Müasir Azərbaycan vətəndaşı tariximizin ən parlaq dönəminə şahidlik etdiyi üçün çox xoşbəxtdir. Həmin tarix 27 sentyabrdır. 27 sentyabr hüznlə kədərin qarışdığı gündür. Hər bir xalq öz qəhrəmanları ilə yadda qalır. Həmin gündə başlayan müharibə bizə yeni dövrün qəhrəmanlarını tanıtdı. 27 sentyabr erməni faşizmi üzərində qələbənin təməlinin qoyulduğu tarixdir. Azərbaycan xalqı 44 günlük Vətən müharibəsi sayəsində bəşəriyyət üçün təhlükəli olan azğın bir düşməni cilovlamağı bacardı. Erməni faşizminin məğlubiyyəti bölgədə birgəyaşayışın, sülh və əmin-amanlığın təməlini qoyan mühüm siyasi hadisədir. İnsanlıq düşməni olan bu azğın adamları zərəsizləşdirdiyi üçün bəşəriyyət Azərbaycan Ordusuna minnətdar olmalıdır. Azərbaycan xalqı Vətən müharibəsində qazandığı qələbə ilə qonşu dövlətlərin və xalqların sülh şəraitində yaşamasına böyük töhfə vermiş oldu. İlanın başı əziləndən sonra o təhlükəli olmur. Biz ilanın başını əzib zəhərli dişini çıxarmaqla müasir dünyaya çox böyük yaxşılıq etmiş olduq. Buna görə də, Anım Günü kimi qeyd etdiyimiz 27 sentyabr təkcə Azərbaycanın deyil, dünyanın siyasi tarixinə qızıl hərflərlə həkk olundu.
Azərbaycanın hərb tarixində Vətən müharibəsi və ya “Dəmir Yumruq Əməliyyatı” kimi adlandırılan 44 günlük müharibə özünəməxsus xüsusiyyətləri ilə müasir müharibənin nümunəsi kimi dünyanın aparıcı hərbi təhsil çüəssisələrində öyrənilir. Əks-hücum əməliyyatı müharibə tarixi üçün bir çox yeniliklərə imza atdı. Bir çox xarici ölkələrin hərbi ekspertləri, hərbi institutları müharibəni təhlil edərək öz ölkələri üçün dərslər çıxardı.
Tarixi Zəfərimizi, suverenliyimizin tam bərpasını bizə bəxş edən qəhrəman əsgər və zabitlərimiz qürur mənbəyimizdir. Onların qəhrəmanlığı, onların şücaəti, fədakarlığı artıq dastana çevrilib. Dövlət başçısı İlham Əliyevin Sərəncamı ilə Vətən müharibəsində qəhrəmancasına döyüşmüş, Azərbaycan Bayrağını işğaldan azad edilən torpaqlarımızda dalğalandırmış, ölkəmizin ərazi bütövlüyü yolunda canlarını fəda etmiş əsgər və zabitlərimizə, bütün şəhidlərimizə dərin ehtiram əlaməti olaraq 27 sentyabrın ölkəmizdə Anım Günü, 20 sentyabrın Dövlət Suverenliyi Günü kimi qeyd olunması özündə bütün məqamları ehtiva edir.
Bu gün bölgədə, o cümlədən Azərbaycan-Ermənistan münasibətlərində gündəliyi formalaşdıran tərəf də Azərbaycandır. Dünya mövcud olduqca bu tarixlə qürur duyacaq, onu öz müqəddəs qanları ilə yazan şəhidlərimizi sonsuz hörmət və ehtiramla anacağıq.

Nəbi Hacıyev - YAP Sabunçu rayon təşkilatının məsləhətçisi