Martın 29-da Daşkəsən Rayon İcra Hakimiyyətinin başçısı Əhəd Abıyev RİHBA-nın məsul işçilərinin, Rayon Polis şöbəsinin rəisi Seymur Əfəndiyevin, kənd inzibati ərazi dairəsi üzrə nümayəndələrin və bələdiyyə sədrlərinin iştirakı ilə rayon ərazisində yaylaq mövsümünə hazırlıqla bağlı müşavirə keçirib.
Müşavirəni giriş nitqi ilə açan Əhəd Abıyev deyib ki, həyata keçirilən təsirli tədbirlərin nəticəsində hazırda rayon ərazisində sanitar-epidemioloji və epizootik vəziyyət sabitdir.
Əhəd Abıyev çıxışında rayonun dövlət mülkiyyətinə aid yay otlaq sahələrindən səmərəli istifadə edilməsi məqsədilə həyata keçirilməsi nəzərdə tutulan tədbirlər və qarşıda duran vəzifələr haqqında deyib:
- Azərbaycan Respublikası Nazirlər Kabinetinin 21 iyun 2013-cü il tarixli 156 nömrəli Qərarına əsasən dövlət fonduna aid yay otlaq sahələrinin səmərəli istifadəsinin və mühafizəsinin təmin edilməsi məqsədilə həmin torpaq sahələri hər bir rayonun özünə aid edilmişdir. O cümlədən də Daşkəsən rayonu ərazisində olan yay otlaqlarının istifadəsinə nəzarət Daşkəsən Rayon İcra Hakimiyyətinə verilmişdir. Həmin qərarın icrası ilə bağlı kənar rayonlardan və rayonun hüquqi və fiziki şəxsləri tərəfindən 2022-ci ilin yay mövsümü ərzində rayon ərazisinə davarların gətirilməsi ilə əlaqədar dövlət fondu yay otlaq sahələrinin səmərəli istifadəsi, mühafizəsi, xəstəliklərin və qansuzluqların qarşısının alınması məqsədilə Daşkəsən Rayon İcra Hakimiyyəti başçısının Sərəncamına əsasən keçid yollarda nəzarət məntəqələri yaradılacaqdır.
Bəzi icarədar işbazlar tərəfindən qonşu rayonlardan olan fermerlərdən müxtəlif bəhanələrlə maddi maraq qarşılığında yaylaqlara iri və xırdabuynuzlu heyvaların qanusuz gətirilməsinin qarşısı tam qətiyyətlə alınsın. Əhali arasında əsassız yalan qərəzli böhtan xarakterli şayiələr yayan maraqlı şəxslər barəsində Rayon Polis Şöbəsi tərəfindən tədbir görülsün.
Əraziyə qanunsuz yolla gətirilən sürülər yerlərdə sakinlərə məxsus əkin sahələrinə, pay torpaqlarına ziyan vurur, yerli sakinlərlə digər hüquqi və fiziki şəxslər arasında qarşıdurmalara, münaqişələrə, məhkəmə çəkişmələrinə səbəb olur. Belə halların qarşısını almaq məqsədilə məsələyə çox ciddi yanaşılmalıdır.
Müvafiq Sərəncama əsasən rayonunun yay otlaq sahələrinin keçid ərazilərində yaradılan məntəqələrdə və mövsüm ərzində bütün yaylaqlarda asayişin qorunması rayon polis əməkdaşlarının iştirakı ilə təmin ediləcəkdir.
Yaradılan məntəqələrə ayrılan mütəxəssislər tərəfindən yaylaq mövsümündə heyvanlar arasında baş verə biləcək xəstəliklərin qarşısının alınması üçün epizootik xəstəliklər üzrə aparılmış profilaktiki tədbirlərin sənədləri tam yoxlanılmalı, baytar şəhadətnaməsi olmayan sürülərin yaylağa buraxılmasına yol verilməməlidir. Nəzarət məntəqələrində mütəxəssislərə xidməti istifadə məqsədilə aidiyyəti şəxslərin, bələdiyyə sədrlərinin, icra nümayəndələrinin əlaqə telefonları və yerli sakinlərə məxsus təsərrüfatlarda olan heyvanların baş sayı barədə müvafiq siyahılar təqdim olunmuşdur. Məntəqəyə yaxınlaşan hər bir təsərrüfat sahibi şəxsiyyətini təsdiq edən sənədi, 1 №-li baytarlıq şəhadətnaməsini, heyvanların baş sayı haqqında arayışı təqdim etdikdən sonra sürülərinin yaylaqlara buraxılması təmin edilə bilər.
Sonra mövcud problemlər təhlili edilmiş və onların həlli yolları müzakirə olunmuşdur.

Elmar Əliyev
Daşkəsən RİHBA-nın İctimai-siyasi və
humanitar məsələlər şöbəsinin müdir müavini