“Kanal13” youtube internet kanalının “Bumeranq” verilişində 17.09.2020-ci il tarixdə yayımlanan “Masallının “KRAL”ı Əhəd Abıyevin TOPDAĞITMAZ NƏHƏNG SƏRVƏTİ: Hotellər, restoranlar, lüks villalar...” başlıqlı Daşkəsən rayon İcra hakimiyyətinin başçısı Əhəd Abıyevlə bağlı əsassız, qərəzli, uydurulmuş, heç bir həqiqətə uyğun olmayan, tam yalan məlumatlardan ibarət videoya münasibət olaraq bildiririk ki, bu qarayaxma kampaniyasının araşdırılması və müvafiq tədbirlərin görülməsi məqsədilə Azərbaycan Respublikasının Baş Prokurorluğuna, Dövlət Təhlükəsizlik Xidmətinə tərəfimizdən müraciət edilmişdir.

Adı çəkilən restoranlar, otellər, ticarət mərkəzləri, torpaq sahələrinin Əhəd Abıyevə heç bir aidiyyəti və onunla qətiyyən əlaqəsi yoxdur. Bu faktlardan biri təsdiqini taparsa adı çəkilən əmlaklar notarial qaydada həmin şəxsə hədiyyə ediləcəkdir.

Hər il bayram tədbirlərində ənənəvi olaraq əsgərlərimiz tərəfindən erməni bayrağı sındırılır. Bir dəfə əsgərlərimiz tərəfindən hazırlanmış bayrağı başçı sındırıb. Sınan erməni bayrağını Kolumbiya bayrağına bənzədənlər isə deməli ermənilərin dostudur.

Bilərəkdən məkrli niyyətlə aparıcı Arzu Sayadoğlunun təqdimatında hazırlanmış şər-böhtan xarakterli məluatları özündə ehtiva edən qərəzli video ilə Daşkəsən rayon İcra hakimiyyətinin başçısı Əhəd Abıyevin işgüzar nüfuzunu ləkələməyə çalışırlar. Birmənalı olaraq bildiririk ki, ictimai fikri çaşdıran bu videodakı məlumatların heç bir əsası yoxdur, tamamilə yalandır, uydurma və şayiədir. Heç bir halda ifadə azadlığı vətəndaşın şərəf və layəqətini ləkələmək hüququ vermir.

Daşkəsən rayon icra Hakimiyyəti Başçısı Əhəd Abıyev köhnə Xalq Təsərrüfatı İnustitunu (indiki İqtisad Universitetini) bitirmişdir. “Təfəkkür” Universitetinin diplomu ilə bağlı bildiririk ki, həmin diplom heç bir yerdə istifadə olunmamışdır. Əgər surəti və ya istifadə olunduğu yer varsa buyurub təqdim edə bilərlər.