Azərbaycan və Ukrayna arasındakı strateji tərəfdaşlıq münasibətləri bu gün özünün ən məhsuldar və sarsılmaz dövrünü yaşayır. Aprelin 25-də Qəbələdə Cənab Prezident İlham Əliyev və Ukrayna Prezidenti Volodimir Zelenski tərəfindən mətbuata verilən bəyanatlar iki ölkə arasındakı əlaqələrin dərinliyini bir daha nümayiş etdirdi. Dövlət başçımızın vurğuladığı kimi, əməkdaşlığımızın çox güclü siyasi təməli vardır və bu təməl hər iki ölkənin suverenliyinə, ərazi bütövlüyünə qarşılıqlı hörmət prinsipləri üzərində qurulub. Tarixi baxımdan bu münasibətlər hələ 1919-cu ildə Ukraynanın ilk səfiri Yusif Vəzir Çəmənzəminlinin fəaliyyəti ilə təməli qoyulan dostluq ənənələrinə söykənir. Müasir dövrdə isə bu siyasi iradə iqtisadi sahədə, xüsusilə energetika sektorunda uzunmüddətli və etibarlı əməkdaşlıq üçün sarsılmaz zəmin yaratmışdır.
Bu strateji yolun ən mühüm iqtisadi aktoru kimi SOCAR Ukraynada uzun illərdir ki, uğurla fəaliyyət göstərir. 2008-ci ildə Ukrayna yanacaq bazarına daxil olan Azərbaycanın dövlət neft şirkəti ötən müddət ərzində bu ölkənin enerji təhlükəsizliyinin əsas dayaqlarından birinə çevrilmişdir. Mətbuat bəyanatında Cənab Prezident İlham Əliyev xüsusi olaraq qeyd etdi ki, SOCAR-ın fəaliyyəti təkcə mövcud nailiyyətlərlə məhdudlaşmır, həm də gələcək üçün yeni perspektivlər və birgə layihələr vəd edir. Statistik məlumatlar da bu uğuru təsdiqləyir; belə ki, indiyədək SOCAR-ın Ukraynadakı ümumi investisiyaları 200 milyon dolları ötüb. Şirkətin ölkənin müxtəlif regionlarında 60-dan çox yanacaqdoldurma məntəqəsi fəaliyyət göstərir ki, bu da Azərbaycan brendinin beynəlxalq bazarda etibarlı yer tutduğunun göstəricisidir.
Cənab Prezidentin uzaqgörən siyasəti nəticəsində SOCAR Ukraynada təkcə bir kommersiya müəssisəsi kimi deyil, həm də genişmiqyaslı humanitar və sosial missiyanın icraçısı kimi tanınır. Xüsusilə çətin dövrlərdə Azərbaycanın dost Ukrayna xalqına göstərdiyi dəstək mətbuat bəyanatlarında da yüksək qiymətləndirilmişdir. SOCAR müharibə dövründə sosial və mədəni layihələrin inkişafına təxminən 7 milyon dollar sərmayə yatırmışdır. Kiyev və digər iri şəhərlərdəki yanacaqdoldurma məntəqələrində yaradılan "dözümlülük məntəqələri" əhalini pulsuz elektrik enerjisi, istilik və qida ilə təmin edərək Azərbaycanın humanitar həmrəyliyinin bariz nümunəsinə çevrilib. Bununla yanaşı, İrpin şəhərindəki Akademik Zərifə Əliyeva adına məktəbin bərpası kimi layihələr SOCAR-ın sosial məsuliyyətli fəaliyyətini bir daha sübut edir.
İqtisadi əlaqələrin dinamikası ticarət dövriyyəsində də özünü göstərir. Hazırda iki ölkə arasında ticarət əməliyyatları aktiv şəkildə davam edir və ticarət dövriyyəsinin yarım milyard dolları ötməsi tərəfdaşlığın real potensialından xəbər verir. Məhz Cənab Prezident İlham Əliyevin rəhbərliyi ilə həyata keçirilən strateji kurs imkan verir ki, enerji sahəsindəki bu uğurlu təcrübə kənd təsərrüfatı, nəqliyyat və logistika kimi digər strateji sahələrə də transfer edilsin. Görüşün nəticələri və səsləndirilən bəyanatlar bir daha təsdiqlədi ki, Azərbaycan və Ukrayna arasındakı güclü siyasi təməl və SOCAR-ın uğurlu fəaliyyəti gələcəkdə daha böyük iqtisadi zəfərlərin və sarsılmaz strateji dostluğun təminatıdır.
Zabrat qəsəbəsi, 192 nömrəli tam orta ümumtəhsil məktəbinin
tarix müəllimi Elxan İsmayılov
