Azərbaycan xalqının öz torpaqlarını düşmən işğalından azad etmək üçün apardığı Vətən müharibəsi və 44 günlük bu müqəddəs savaşda qazandığı qələbə ölkəmizin tarixinə qızıl hərflərlə yazılıb. Öz canları bahasına şanlı tarix yazan qəhrəman şəhidlərimizin, igid qazilərimizin şücaəti dillərdə dastan olub. Azərbaycan Ordusunun misilsiz hünəri, sarsılmaz iradəsi, yenilməzliyi hərbi dərsliklərə düşdü. XXI əsrin hərb tarixinə fenomen kimi yazılan 44 günlük müharibə bir yumruq kimi səfərbər olmuş xalqın birliyinin təcəssümü idi. Xalqın birliyi qarşısında aciz qalan və təslim aktına imza atan düşmənə elə bir dərs verildi ki, yəqin ki, heç vaxt unutmayacaq. “Dəmir yumruq” kimi birləşmiş, bütün Azərbaycanın zəfərində inkaredilməz bir faktor var-Ali Baş Komandan faktoru!Müharibə dövrünün ən ağır, ən böyük yükünü çiyinlərində daşıyan sərkərdə “Dəmir yumruq” sahibi, ölkə başçımız eyni zamanda “dəmir məntiqi” ilə döyüşürdü. Böyük intellekt, sarsılmaz iradə, güclü qətiyyət sahibi olan cənab İlham Əliyev həmin günlərdə hər yerdə idi-diplomatiya cəbhəsində, siyasət meydanında, informasiya müharibəsində. Hamısında da ön cərgədə idi. Müharibənin gedişatı ilə bağlı elə bir məqam,hadisə,detal,ideya yox idi ki, cənab İlham Əliyev ona toxunmasın, münasibət bildirməsin, xalqı məlumatlandırmasın. Çünki prezident gücünü öz xalqından alırdı. O bilirdi ki,dayağı, arxas el olanın başı göylərə çatar,kürəyi yerə gəlməz. Belə də oldu! Xalqın birliyi, əzmi, iradəsi, gücü,sərkərdəsinə olan inamı qələbəni gətirdi. Xalqımız qalib xalq oldu. Müzəffər Ali Baş Komandanın rəhbərliyi altında Zəfərimizə qovuşduq!
Bu gün Qarabağda, Zəngəzurda aparılan quruculuq işlərində.2023-cü ilin sentyabrında keçirilən anti-terror əməliyyatında xalqımız yenə də bir yumruq kimi səfərbər oldu.Ərazi bütövlüyümüz və suverenliyimiz tam bərpa olundu.
Xankəndində, Xocalıda qaldırılan üçrəngli, ay-ulduzlu,şəhidlərimizin müqəddəs əmanəti olan Azərbaycan bayrağı qürurla dalğalanır,”Biz qayıtdıq!” “Həmişəlik qayıtdıq!” sədaları göylərə yüksəlir.
Bilgəh qəsəbəsi, 142 saylı tam orta məktəbin
Müəllimi Məhəbbət Hüseynova
