Bəkir Yusifov – Azərbaycan Neft və Qaz Sənayesi İşçiləri Həmkarlar İttifaqının əməyin mühafizəsi sahəsində örnək fəaliyyəti ilə tanınan mütəxəssisi
Azərbaycan Neft və Qaz Sənayesi ölkənin iqtisadi inkişafında strateji rol oynayan bir sahədir. Bu sahənin dayanıqlı və təhlükəsiz şəkildə inkişafı üçün təkcə texniki imkanlar deyil, insan amilinə yönəlmiş düşünülmüş və məsuliyyətli yanaşma da zəruridir. Məhz bu istiqamətdə uzun illərdir böyük səmimiyyət və peşəkarlıqla çalışan insanlardan biri də Azərbaycan Neft və Qaz Sənayesi İşçiləri Həmkarlar İttifaqı Respublika Komitəsinin Əməyin mühafizəsi şöbəsinin mütəxəssisi Bəkir Yusifovdur.

Bəkir Yusifov bu məsuliyyətli sahədə işlədiyi illər ərzində hər zaman öz prinsipial mövqeyi, işinə olan sevgisi və dürüst münasibəti ilə həmkarlarının dərin hörmətini qazanmışdır. Onun əsas məqsədi – neft və qaz sənayesi sahəsində çalışan işçilərin təhlükəsiz və sağlam əmək şəraitində fəaliyyət göstərməsini təmin etmək, bu sahədə beynəlxalq standartlara uyğun iş mühitinin yaradılmasına töhfə verməkdir.

Əməyin mühafizəsi sahəsində daim maarifləndirmə tədbirlərinin keçirilməsi, istehsalatda mümkün risklərin vaxtında müəyyənləşdirilməsi və qarşısının alınması, təhlükəsizlik texnikası qaydalarının yerinə yetirilməsinə nəzarət kimi məsələlər Bəkir müəllimin əsas fəaliyyət istiqamətlərindəndir. Onun təşəbbüsü ilə müxtəlif istehsalat müəssisələrində mütəmadi yoxlamalar, təlimlər və seminarlar keçirilir. Bu da həm işçilərin məlumatlılığını artırır, həm də istehsalat qəzalarının sayını minimuma endirməyə kömək edir.

Bəkir Yusifovun fəaliyyəti təkcə əmək təhlükəsizliyi ilə məhdudlaşmır. O, həm də sosial məsuliyyətli bir şəxs kimi, xüsusilə şəhid ailələri və qazilərlə bağlı məsələlərə həssaslıqla yanaşır. O, tez-tez bu ailələri ziyarət edir, onlara mənəvi dəstək göstərir və sosial problemlərinin həllində köməklik göstərir. Bəkir müəllim bu istiqamətdə gördüyü xeyirxah işlərlə sadəcə bir mütəxəssis deyil, həm də örnək vətəndaş obrazı formalaşdırmışdır.

Əlamətdar odur ki, belə yüksək dəyərləri və humanist düşüncəni özündə birləşdirən insan Qurban Bayramı ərəfəsində də fəallığı ilə seçilir. O, bu müqəddəs bayramın paylaşma və mərhəmət ruhuna uyğun olaraq, aztəminatlı ailələrə yardım edir, qurban paylarının ehtiyacı olanlara çatdırılmasında şəxsən iştirak edir. Onun bu davranışları həm həmkarları, həm də ictimaiyyət tərəfindən təqdirlə qarşılanır.

Bəkir Yusifov Prezident İlham Əliyevin apardığı sosial-iqtisadi siyasəti yüksək dəyərləndirir, xüsusilə əmək hüquqlarının qorunması, işçi təhlükəsizliyi və əmək mühitinin humanistləşdirilməsi istiqamətində atılan addımlara tam dəstək göstərir. O inanır ki, bu siyasət Azərbaycan işçisinin hüquqlarını daha da gücləndirəcək və ölkəmizdə sosial ədalət prinsipinin reallaşmasında mühüm rol oynayacaq.

Sonda Bəkir Yusifov Qurban Bayramı münasibətilə bütün xalqımızı təbrik edir, hər bir ailəyə can sağlığı, bolluq və əmin-amanlıq arzulayır. Onun sözlərinə görə, bu müqəddəs bayram insanlar arasında sevgi və həmrəyliyin, yardımlaşma və qardaşlığın ən gözəl təzahürüdür. Bayramın ruhuna uyğun olaraq birliyimizi daha da gücləndirməli, ehtiyacı olanlara əl uzatmalı və Azərbaycanımızın inkişafı naminə daha səylə çalışmalıyıq.

Bəkir Yusifov – sadəcə bir mütəxəssis yox, həm də nümunəvi vətəndaş kimi işığı ilə ətrafındakı hər kəsə yol göstərir.