Milli Kitabxanada “Aprel döyüşləri” adlı virtual sərgi onlayn rejimdə istifadəçilərə təqdim olunubAzərbaycan ordusunun qələbəsi ilə bitən aprel döyüşlərindən altı il ötür. 2016-cı ildə baş vermiş dördgünlük müharibədə qəhrəman əsgər, gizir və zabitlərimiz təcavüzkar Ermənistan ordusuna ağır zərbələr endirərək 2 min hektardan artıq ərazini işğaldan azad etdilər. Ötən müddət ərzində işğaldan azad olunan ərazilərdə, o cümlədən aprel qələbəsi ilə düşmən təhlükəsinin uzaqlaşdırıldığı Cəbrayıl rayonunun Cocuq Mərcanlı kəndində təmir-bərpa işləri aparılıb, orada yeni qəsəbə salınıb, ata-baba yurdlarından didərgin salınan insanlar geri dönüblər.
Bu döyüşlər onu göstərir ki, Azərbaycan xalqı və dövləti heç vaxt işğalla barışmayacaq, öz ərazi bütövlüyünü nəyin bahasına olursa-olsun bərpa edəcəkdir. Belə də oldu, 44 günlük İkinci Qarabağ müharibəsində müzəffər Azərbaycan Ordusu Ali Baş Komandan İlham Əliyevin rəhbərliyi altında erməni işğalçılarını darmadağın edərək, 30 illik işğala son qoydu, ölkəmizin ərazi bötüvlüyünü bərpa etdi. Aprel döyüşləri Azərbaycan Ordusunun yüksək döyüş qabiliyyətini nümayiş etdirdi, Prezident, Ali Baş Komandan İlham Əliyevin hərbi sahəyə göstərdiyi diqqətin, silahlı qüvvələrin işğal olunmuş əraziləri istənilən an azad etmək bacarığının göstəricisi oldu.
Aprel döyüşlərinin 6-cı ildönümü münasibətilə M.F.Axundzadə adına Azərbaycan Milli Kitabxanasının əməkdaşları tərəfindən “Aprel döyüşləri” adlı virtual sərgi hazırlanıb. Virtual sərgidə fotolar, mövzu ilə əlaqədar kitab və məqalələr nümayiş olunur.
Virtual sərgi ilə tanış olmaq istəyənlər linkindən istifadə edə bilərlər.
M.F.Axundov adına Azərbaycan Milli Kitabxanasının direktoru professor Kərim Tahirov - Müstəqil Azərbaycan Respublikasında Prezident postuna keçirilən sayca 8-ci rəsmi seçkidə cənab İlham Əliyev seçicilərin böyük əksəriyyətinin səsini qazanaraq Azərbaycan Respublikasının Prezidenti seçildi.
Prezident İlham Əliyevin istər daxili, istərsə də xarici uğurlu siyasəti nəticəsində ölkəmiz böyük inkişaf yolu keçib, dövlətimizin qüdrəti və iqtisadiyyatı artıb, Azərbaycanın beynəlxalq arenada nüfuzu daha da güclənib. Dövlət siyasətinin başlıca prioritetlərindən biri xalqımızın rifahı və milli maraqları olmuşdur. Xalqımız görülən işləri yüksək qiymətləndirərək daha təhlükəsiz və inkişafyönümlü gələcəyi seçmişlər.
Qeyd etmək lazımdır ki, Azərbaycan Respublikasının beynəlxalq aləmdə nüfuzu Prezident İlham Əliyevin rəhbərliyi dövründə daha da artmışdır. Cənab Prezidentin rəhbərliyi ilə həyata keçirilən diplomatik uğurlar və xarici siyasət Azərbaycanın ATƏT, BMT, AŞ kimi təşkilatlarda daha qətiyyətli çıxış etməsinə, beynəlxalq arenada Prezidentin və nümayəndələrin rəyinə daha hörmətlə yanaşılmasına imkan yaratmışdır.
Azərbaycan xalqı Prezident İlham Əliyevə səs verərək xarici qrant, ianə hesabına fəaliyyət göstərən xainlik və dağıdıcılıq məqsədi güdən, bir çox hallarda milli satqınlıq nümayiş etdirən qüvvələrə Azərbaycanın siyasi səhnəsində yeri olmadığını bir daha göstərmiş oldu.
Prezident İlham Əliyevin hakimiyyət illəri tariximizə möhtəşəm iqtisadi yüksəliş dövrü kimi daxil olmuşdur. Bu illər ərzində ümumi daxili məhsul 3,2 dəfə, büdcə gəlirləri isə 13,5 dəfə artıb. Maliyyə imkanlarımız və strateji valyuta ehtiyatlarımız ciddi şəkildə yüksəlmişdir. Azərbaycanın ixracatdakı payı, regionlarda ümumi məhsul buraxılışı, xarici ticarət dövriyyəsi əsaslı şəkildə inkişaf etmişdir. Ölkədə minimum əməkhaqqı 12.9 dəfə, əhalinin nominal gəlirləri 8.6 dəfə artmışdır. İşsizliyin və yoxsulluğun səviyyəsi 5 faizə qədər enmişdir. Bu dövr ərzində pensiyalar 10 dəfədən çox, maaşlar isə 7 dəfə artmışdır. Ölkəmizin davamlı inkişafı və siyasi sabitliyi daha da yüksəlmişdir.
Azad sahibkarlığa dəstəyi daima diqqət mərkəzində saxlayan cənab Prezident İlham Əliyevin rəhbərliyi ilə 2003-2018-ci illər ərzində sahibkarlara 2 milyard manatdan çox güzəştli şərtlərlə kreditlər vermişdir. Başlıca olaraq qeyri-neft sektorunun inkişafına yönəlmiş bu kreditlər nəticəsində ölkəmizdə minlərlə yeni müəssisə yaradılmışdır.
Prezident İlham Əliyevin hakimiyyəti illərində ölkəmizdə neft-qaz sektoru əsaslı şəkildə inkişaf etmişdir. Ulu Öndər Heydər Əliyevin təməlini qoyduğu Bakı-Tbilisi-Ceyhan neft kəmərinin 2006-cı ildə istifadəyə verilməsi ilə ölkənin gəlirləri daha da artmışdır. 2007-ci ildə Bakı-Tbilisi-Ərzurum qaz kəmərinin fəaliyyətə başlaması Azərbaycanı qaz ixracatçısına çevirmişdir. 2014-cü ildə “Cənub Qaz Dəhlizi”nin təməli qoyulmuş və 2018-ci ildə Türkiyədə bu dəhlizin mühüm hissəsi olan Trans-Anadolu (TANAP) qaz boru kəmərinin açılışı olmuşdur.
Prezident İlham Əliyevin əsas hədəflərindən biri də daima milli maraqların qorunmasına, xalqın milli ideya ətrafında birləşməsinə, vətənpərvərlik ruhunun gənclər arasında daha da təbliğ edilməsinə yönəlmişdir. Cənab Prezidentin hakimiyyəti illərində ordumuz sürətlə inkişaf etmişdir. Böyük zəfərin başlanğıcı hesab olunan Aprel döyüşlərindəki qələbəmiz və 44 günlük Vətən müharibəsindəki Zəfərimiz Ali Baş Komandanın qətiyyətli mövqeyini, Azərbaycan Ordusunun gücünü, qələbə əzmini və ordu quruculuğunun necə inkişaf etdiyini göstərir.
2003-cü ildən Azərbaycan Respublikası enerji idxalçısından ixracatçısına çevrilmişdir. Ölkəmizdə bu sahəyə geniş yatırımlar edilmiş, böyük infrastruktur layihələr reallaşdırılmışdır. Son illərdə alternativ enerji sahəsinin ölkəmizdə inkişaf etməsi və xarici investorların bu sahəyə cəlb edilməsi birbaşa ölkə rəhbərliyinin uğurlu siyasətinin nəticəsidir.
Cənab Prezidentin hakimiyyəti dövrü ərzində yol və nəqliyyat infrastrukturunun və su təchizatının inkişafı istiqamətində böyük işlər görülmüşdür. Bu illər ərzində 15 min kilometr yeni yol çəkilişi təmin edilmiş, yeni aeroportlar istifadəyə verilmişdir. Əhalinin içməli su təchizatı ilə bağlı problemləri aradan qaldırılmış, sakinlərin içməli su ilə bağlı təminatı artmışdır. Kənd təsərrüfatının inkişafı üçün bir neçə su anbarı tikilmiş və digər meliorasiya tədbirləri görülmüşdür.
Bütün bunlar onu söyləməyə əsas verir ki, Prezident İlham Əliyevin rəhbərliyi ilə Azərbaycan yeni bir inkişaf mərhələsinə qədəm qoymuşdur. Ölkəmiz həm daxili, həm də xarici siyasətdə mühüm uğurlara imza atmışdır.
