Azərbaycan Respublikasının sürətli inkişafında regionların sosial-iqtisadi dirçəlişi mühüm yer tutur. Bu baxımdan, işğaldan azad olunmuş ərazilərimizin yenidən qurulması, orada infrastrukturun yaradılması və turizm potensialının reallaşdırılması dövlət siyasətinin prioritet istiqamətlərindəndir. Zəngilan rayonu da bu istiqamətdə xüsusi əhəmiyyət daşıyır. Zəngilanın təbii gözəllikləri, zəngin flora və faunası, eləcə də coğrafi mövqeyi onun turizm baxımından böyük imkanlara malik olduğunu göstərir.
Ulu öndər Heydər Əliyev hər zaman Azərbaycanın bölgələrinin tarixi və mədəni irsinin qorunmasına xüsusi diqqət yetirmiş, milli dəyərlərin gələcək nəsillərə ötürülməsini vacib hesab etmişdir. Bu siyasi kursu uğurla davam etdirən cənab Prezident İlham Əliyev isə bu gün həmin ərazilərdə, xüsusilə də Zəngilan rayonunda genişmiqyaslı bərpa və yenidənqurma işləri həyata keçirir. Cənab Prezidentin rəhbərliyi ilə rayonda müasir infrastruktur qurulur, yollar, hava limanı, yaşayış massivləri, məktəblər, mədəniyyət mərkəzləri və turizm obyektləri inşa edilir.
Zəngilan rayonu həm də ekoturizm və aqroturizm üçün çox əlverişlidir. Buradakı sıx meşələr, təmiz hava, çaylar və dağlıq relyef turizm həvəskarları üçün ideal şərait yaradır. Oxçuçay və Həkəri çaylarının sahilində yaradılacaq istirahət zonaları və dağ kəndlərinin bərpası bölgəyə yerli və xarici turist axınının artmasına şərait yaradacaq. Bu proses, eyni zamanda, əhalinin məşğulluğuna və yerli iqtisadiyyatın canlanmasına böyük töhfə verəcəkdir.
Zəngilanın bərpası təkcə iqtisadi deyil, həm də mənəvi baxımdan mühüm əhəmiyyət daşıyır. Çünki bu torpaqlar Azərbaycanın əzəli və əbədi hissəsidir. Bu gün həmin ərazilərdə həyata keçirilən genişmiqyaslı layihələr cənab Prezident İlham Əliyevin rəhbərliyi ilə aparılan uğurlu siyasətin bariz nümunəsidir.
Bütün bu işlər göstərir ki, dövlətimizin məqsədi yalnız bərpa yox, həm də Zəngilanı bölgənin ən cəlbedici turizm mərkəzlərindən birinə çevirməkdir. Turizm potensialının inkişafı sayəsində Zəngilan təkcə iqtisadi baxımdan deyil, həm də mədəni və ekoloji dəyərləri ilə Azərbaycanın parlayan guşəsinə çevriləcək.
Balaxanı qəsəbəsi, 259 nömrəli tam orta ümumtəhsil məktəbi publik hüquqi şəxsi Biologiya müəllimi Vəsilə Muradlı
