Rusiyanın Kemerovo vilayətində kömür sənayesindəki böhran səbəbindən artıq 17 müəssisənin fəaliyyəti dayandırılıb.

“İnterfaks” məlumatına görə, bunu mətbuat konfransında regionun qubernatoru İlya Seredyuk söyləyib.

“Qərb sanksiyaları və dünya qiymətlərinin enməsi səbəbindən kömür sənayesi hazırda çətinliklər yaşayır. Bağlanan müəssisələrə gəlincə, hazırda onların sayı 17-dir və hamısı birdəfəlik bağlanmayıb”, – deyə Seredyuk bildirib, amma konkret hansı müəssisələrdən söhbət getdiyini açıqlamayıb.

Onun sözlərinə görə, bağlanmış müəssisələrin yarısı konservasiya edilib, işçilər isə holdinqlərin tərkibindəki digər müəssisələrə yönləndirilib: “Bizim bir neçə müəssisəyə nəzarət edən iri holdinqlərimiz var və işçilər həmin müəssisələrə yerləşdirilib”.

Qubernator xatırladıb ki, regionda ümumilikdə 151 kömür hasilatı və emalı müəssisəsi fəaliyyət göstərir.