Bu gün Topaz Premyer Liqasında XV turun oyunları keçiriləcək. Apasport.az saytının məlumatına görə, ilin son turunun bütün matçları eyni gündə baş tutacaq.

İkinci dövrənin yekun turuna Qəbələdə start veriləcək. Yerli komanda “Kəpəz”i qəbul edəcək. Əslində təqvimə görə Gəncədə keçirilməli olan qarşılaşma qərblilərin meydança probleminə görə, “qırmızı-qaralar”ın stadionunda oynanılacaq.

Ötən turun qalmaqallı matçında “Qarabağ”a uduzub, zirvəni əldən verən “qırmızı-qaralar” 1-ci pilləyə qayıtmaq üçün mütləq qalib gəlməlidi. Qərblilər isə qış fasiləsinə 4-cü sırada yollanmaq üçün 3 xal qazanmağa borcludu.

İkinci oyunda isə “Zirə” Sumqayıtda “gənclik şəhəri”nin eyniadlı komandasına qonaq olacaq. Qəbələdəki görüşün nəticəsindən asılı olaraq bu matçın qalibinin 4-cü pilləyə yüksəlmək şansı var. Məğlub olan isə 6-cı sırada qərarlaşacaq. 3 turdu uduzmayan sumqayıtlılar uğurlu seriyasını davam etdirməyə iddialıdı. Zirəlilər isə 3 matçlıq qələbə həsrətinə səfərdə son qoymağa çalışacaq.

İlin son paytaxt derbisində çempionatın autsayderləri görüşəcək. Cari mövsüm heç-heçə etməyən “Neftçi” iki matçlıq qələbə intizarını AZAL-la görüşdə qırmalıdı. Autsayder isə 17 oyunluq qələbə həsrətini bitirmək arzusundadı.

Turun mərkəzi oyununda “Qarabağ” “İnter”i qəbul edəcək. 4 turdu meydanı qolsuz tərk etməyən sonuncular liderlərə yaxınlaşmaq, ağdamlılar isə qələbə seriyasını 7-yə çatdırmaq üçün mübarizə aparacaq. “Bankirlər” istənilən nəticədə 3-cü pillədə qalacaq. Əyalət klubu isə zirvəni “Qəbələ”yə qaytarmamaq üçün ən azı 1 xal qazanmalıdı. Təbii ki, sonuncuların qalib gəlməsə, ağdamlılar məğlubiyyətlə də mövqeyini qoruyacaq.


Topaz Premyer Liqası

XIV tur

17 dekabr (şənbə)

14:00. “Qəbələ” – “Kəpəz”
Hakimlər: Əliyar Ağayev, Rza Məmmədov, Rahil Ramazanov, Ziya Nəsirov
AFFA nümayəndəsi: Eldar Qasımov
Hakim-inspektor: Murad Məmmədov
Qəbələ şəhər stadionu


16:00. “Sumqayıt” – “Zirə”
Hakimlər: Ömər Paşayev, Mehman Mahmudov, Vüqar Bayramov, Nahid Əliyev
Əlavə köməkçi hakimlər: Rəhim Həsənov, Rəvan Həmzəzadə
AFFA nümayəndəsi: Mübariz Hüseynov
Hakim-inspektor: Kərim Ağayev
Sumqayıt şəhər stadionu


17:00. “Neftçi” – AZAL
Hakimlər: Rauf Cabbarov, Mübariz Haşımov, Vüsal Qənbərov, Elman Musayev
Əlavə köməkçi hakimlər: Elvin Əsgərov, Ramil Əhmədov
AFFA nümayəndəsi: Rauf Əmirov
Hakim-inspektor: Əhmədağa Cabbarov
8-ci km qəsəbə stadionu

17:00. “Qarabağ” – “İnter”
Hakimlər: Fariz Yusifov, Namiq Yusifov, Akif Əmirəli, Yaşar Abbasov
Əlavə köməkçi hakimlər: Ramil Diniyev, İnqilab Məmmədov
AFFA nümayəndəsi: Eldəniz Musayev
Hakim-inspektor: Vüsal Əliyev

Suraxanı qəsəbə stadionu