Bu gün sülh və təhlükəsizlik yalnız milli sabitliyin deyil, həm də regional və qlobal inkişafın təmin olunmasında həlledici rol oynayır. Hər bir dövlətin iqtisadi, siyasi və sosial tərəqqisinin əsasında sabit mühit və etibarlı təhlükəsizlik sistemi dayanır. Bu baxımdan, müasir dövrdə beynəlxalq və regional təşkilatların üzərinə böyük məsuliyyət düşür.
Türk Dövlətləri Təşkilatının təməl sənədi olan Naxçıvan Sazişində sülhün qorunması və təhlükəsizliyin təmin edilməsi əsas məqsəd və vəzifələrdən biri kimi göstərilmişdir. Bu, təşkilatın yalnız mədəni və iqtisadi sahələrdə deyil, həm də təhlükəsizlik istiqamətində vahid mövqedən çıxış etməyə sadiqliyini nümayiş etdirir.
Dünyada artan geosiyasi gərginliklər, yeni təhlükəsizlik çağırışları və regionlararası rəqabət fonunda Türk dövlətlərinin birliyinin strateji əhəmiyyəti daha da artır. Ötən il Şuşada keçirilmiş qeyri-rəsmi Zirvə Görüşündə qəbul edilmiş Qarabağ Bəyannaməsi və bu il keçirilən Zirvə Görüşünün “Regional sülh və təhlükəsizlik” mövzusuna həsr olunması da bu istiqamətdə mühüm addım kimi qiymətləndirilir.
Azərbaycan Respublikasının Prezidenti İlham Əliyev bu platformalarda çıxış edərək, regionda sülhün və təhlükəsizliyin möhkəmləndirilməsi üçün Türk dövlətləri arasında həmrəyliyin və koordinasiyalı fəaliyyətin vacibliyini xüsusi vurğulamışdır. Onun təşəbbüsləri Türk dünyasında birliyin güclənməsinə və təşkilatın beynəlxalq arenada daha təsirli faktora çevrilməsinə mühüm töhfə verir.
Bu sənədlər Türk dövlətlərinin təhlükəsizlik məsələlərində vahid güc mərkəzi kimi çıxış etmək niyyətini göstərir. Regionda sabitliyin və davamlı inkişafın təmin olunması üçün birgə siyasi iradə və koordinasiyalı fəaliyyət xüsusi önəm daşıyır.
Nəticə etibarilə, sülh və təhlükəsizlik konsepsiyasının təşkilatın prioritetləri sırasına daxil edilməsi, Türk dünyasının qlobal arenada mühüm və təsirli faktor kimi mövqeyini gücləndirir. Bu, həm milli inkişafın təmin olunmasına, həm də regionda uzunmüddətli sabitliyin möhkəmləndirilməsinə xidmət edir.
Balaxanı qəsəbəsi, 259 nömrəli tam orta ümumtəhsil məktəbi publik hüquqi şəxs
Azərbaycan dili və ədəbiyyat müəllimi Osmanova Türkan
