Cücük kəndində Şəhid Babayov Bəhlulun xatirəsi anılıb
27 yanvar 2023-cü il tarixdə Ağdaş rayonunun Cücük kəndində doğulub boya-başa çatmış şəhid Babayev Bəhlul Abdi oğlunun Birinci Qarabağ müharibəsində şəhadətə yüksəlməsinin növbəti ildönümü ilə əlaqədar adına inşa olunmuş bulaq kompleksinin açılışı olmuş və anım tədbiri keçirilmişdir. Anım tədbirində rayon İcra Hakimiyyətinin məsul əməkdaşları, ictimaiyyətin nümayəndələri, məktəblilər, şəhidin doğmaları və kənd sakinləri iştirak ediblər. Tədbirdə Dövlət Himni səsləndirilib, ölkəmizin ərazi bütövlüyü uğrunda şəhid olan qəhrəman oğulların xatirəsi bir dəqiqəlik sükutla yad edilib. Şəhidlərin xatirə lövhəsinin qarşısında məktəblilərin təqdimatında vətənpərvərlik mövzusunda kompozisiya nümayiş etdirilib. Allah bütün şəhidlərimizə rəhmət eləsin! Ruhları şad olsun!
Ağdaş rayon İcra Hakimiyyətinin başçısı Tofiq İbrahimov - Hər bir ölkənin sosial inkişafının, rifahının aparıcı qüvvəsi olan gənc nəsil həm də qlobal tərəqqinin lokomotividir. Azərbaycanda əhalinin təxminən 23 faizini təşkil edən gənclərə diqqət və qayğı, onların milli-mənəvi dəyərlər və vətənpərvərlik ruhunda tərbiyə edilməsi dövlət siyasətinin əsas istiqamətlərindən birini təşkil edir.
Gənclər siyasəti dövlət siyasətinin mühüm və ayrılmaz tərkib hissəsidir. Bu gün Azərbaycan gəncliyi ictimai həyatın bütün sahələrində kifayət qədər fəaldır.
Prezident İlham Əliyev özünün çıxışlarında hər zaman gənclərin ictimai-siyasi və humanitar proseslərdə göstərdiyi səyləri nəzərə alaraq bu təbəqəni novator, yeniliyə can atan və vətənpərvər insanlar kimi təqdim edir. Həqiqətən də bu gün dövlətin gənclər üçün yaratdığı geniş imkanlar onları nəinki cəmiyyətin avanqard qüvvəsinə çevirir, həm də gənc nəsli özünün intellektual potensialı ilə Azərbaycanı beynəlxalq müstəvidə daha əzmlə təmsil etməyə sövq edir.
Azərbaycan gənclərinin vətənə sədaqət ruhunda tərbiyə edilməsi məsələsi Heydər Əliyevin azərbaycançılıq ideologiyasının mühüm istiqamətlərindən biridir. Ulu Öndər Heydər Əliyev Azərbaycanda siyasi hakimiyyətdə olduğu bütün dövrlərdə gənc nəslin inkişafını dövlət siyasətinin vacib istiqamətlərindən biri kimi qeyd edib, müəyyənləşdirib.
Ümummilli lider Heydər Əliyev gənclər sahəsində dövlət siyasətinin uğurla həyata keçirilməsi məqsədilə bütün dünyaya nümunə olacaq bir sıra addımlar atıb, məhz O, bu sahənin zəruri qanunvericilik bazasının formalaşdırılmasını təmin edib. Ulu öndərin ölkəmizə rəhbərliyi dövründə “Gənclər siyasəti haqqında” Azərbaycan Respublikasının Qanunu qəbul edilib.
Bu gün ölkəmizdə gənclərin hərtərəfli inkişafına hesablanmış dövlət siyasəti Prezident İlham Əliyevin rəhbərliyi ilə özünün ən parlaq səhifələrini yazmaqdadır. Ulu Öndərin siyasətini layiqincə davam etdirən Prezident İlham Əliyevin də illər ərzində əsas fəaliyyət istiqamətlərindən biri gənclər sahəsi olub. Bu baxımdan, ölkə başçısı gənclərə xitab edərək deyir: "Mənim gənclərə xüsusi münasibətim var, mənim ürəyim sizinlədir. Siz bütün işlərdə mənə arxalana bilərsiniz. Mən də sizə arxalanıram". Gənclərin vətənpərvərlik tərbiyəsi, mənəvi inkişafı, təhsili, sosial müdafiəyə ehtiyacı olanların problemlərinin həlli istiqamətində görülən işlər, gənclər təşkilatlarının formalaşması və inkişafı üçün yaradılan şərait bu sahəyə böyük diqqətin nəticəsidir.
İyirmi beş il bundan əvvəl ulu öndər Heydər Əliyevin Sərəncamı ilə Azərbaycanda Gənclər Günü təsis edildi və o gündən bu günə qədər fevralın 2-də biz bu günü qeyd edirik. Ondan bir il əvvəl isə Heydər Əliyevin təşkilatçılığı və təşəbbüsü ilə Azərbaycanda Birinci Gənclər Forumu keçirilmişdir. O vaxtdan bu günə qədər gənclər siyasəti daim dövlətin prioritetləri sırasında olmuşdur. Prezident cənab İlham Əliyevin 2007-ci ilin “Gənclər ili” elan edilməsi ilə bağlı Sərəncamı gənclərin ölkənin ictimai-siyasi və mədəni həyatında fəallığının daha da yüksəlməsinə səbəb olmuşdur.
“Qara qızıl”ın insan kapitalına çevrilməsi strategiyasının icrası çərçivəsində gənclərin qabaqcıl xarici təhsil proqramlarına cəlb edilməsi təşkil olunmuşdur.
Azərbaycan gənclərinin xarici ölkələrdə təhsil üzrə Dövlət Proqramlarının icrası ilə bütün təbəqələrdən olan gənclərin xaricdə təhsilinə geniş imkanlar yaradılıb. Bu proqramlar çərçivəsində minlərlə gənc dünyanın ən nüfuzlu təhsil ocaqlarında oxuyur.
Prezident İlham Əliyevin gənclərə dəstək yönündə verdiyi mühüm və əlamətdar qərarlardan biri də 2013-cü il 2 iyul tarixində ölkədə ilk dəfə “Gənclər üçün Prezident Mükafatı”nın təsis edilməsi olmuşdur.
Bu gün Azərbaycan gəncləri öz gününü qalib ölkənin vətəndaşları kimi, qürurla qeyd edir. Azərbaycan gəncliyi ən yüksək münasibətə layiqliyini, doğma torpaq, yurd sevgisini, cəsarət və fədakarlığını Vətən müharibəsində sübuta yetirdi. Ali Baş Komandanın əmri ilə torpaqlarımızı işğaldan azad edən rəşadətli ordumuzun sıralarında minlərlə gəncimiz mətanətlə vuruşaraq qəhrəmanlıq salnaməsi yazdı.
Müzəffər Ali Baş Komandan İlham Əliyev bildirmişdir ki, "Bu gün Azərbaycan gəncləri cəmiyyətimizin fəal hissəsidir. Biz haqlı olaraq gənclərimizlə fəxr edə bilərik. Bizim gənclərimiz torpaq uğrunda, Vətən uğrunda vuruşurlar. Bizim şəhidlərimizin böyük əksəriyyəti gənclərimiz olubdur. Bizim gənclərimiz hərbi qələbələrimizi şərtləndiriblər".
Bu yüksək münasibətə cavab olaraq ölkəmizin parlaq gələcəyinin təminatçısı olan gənclər bütöv və müstəqil Azərbaycan naminə bütün güclərini səfərbər edir, Vətənin inkişafı üçün daha səylə çalışır, öz siyasətində onlara arxalanan Prezident İlham Əliyev cənablarının uğurlu daxili və xarici siyasətini dəstəkləyirlər.
Bütün dövrlərdə gəncliyin mənəvi və fiziki sağlamlığı cəmiyyət üçün önəmlidir. Əgər bir ölkədə gəncliyə yüksək diqqət və qayğı varsa, deməli o cəmiyyətdə gənclər proqressiv, intellektual, mənəvi və fiziki baxımından sağlam olacaqlar.
Bu gün gənclərlə iş sahəsində normativ hüquqi bazanın təkmilləşdirilməsi və gənclər siyasətinin həyata keçirilməsinin səmərəliliyinin artırılması üçün mühüm tədbirlər görülür, gənclərə geniş fəaliyyət azadlığı təmin olunur.
Bu fürsətdən yararlanaraq hər bir gəncimiz Azərbaycanın inkişafı, bütövlüyü və müstəqilliyi naminə qarşıya qoyulan bütün hədəflərə çatmağa qadirdir.
