“Bütün dünya Qarabağı Azərbaycanın tərkib hissəsi hesab edir. Bu məsələdə bizim müttəfiqimiz olmayıb və indi də yoxdur”.

“Bunu Ermənistanın sabiq prezidenti Levon Ter-Petrosyan İTV-yə müsahibəsində deyib.

Onun fikrincə,1994-cü ildə Qarabağ məsələsinin ermənilərin maraqlarına uyğun həll etmək olardı və o zaman bu şans əldən verildi.

Sabiq prezident deyib ki, Azərbaycan torpaqlarını əbədi işğal altında saxlama düşüncəsi absurd yanaşma idi: “Bu məsələdə müttəfiqimiz yox idi və olmayıb da... İndi vəziyyət daha mürəkkəbdir. Əgər o zaman qarşılıqlı güzəşt mümkün idisə, indi bu imkanlar yoxdur. Biz bu imkanları itirdik. Bizdə heç nə yoxdur. Bu məsələdə ermənistanın həlledici səsi yoxdur”.

Köçəryanın Şuşa və Hadrutun qaytarılması ilə bağlı səsləndirdiyi fikirlərə münasibət bildirən Petrosyan deyib ki, bu ciddi problemlərin yaranmasına gətirib çıxarar: “Orada hazırda Azərbaycan ordusu dayanır. Bu, ancaq müharibə yolu ilə ola bilər. Yəni Köçəryan yeni müharibə vəd edir. Azərbaycanı oradan çıxmağa kim məcbur edəcək? Hansı ki bütün dünya Qarabağı Azərbaycanın tərkib hissəsi kimi tanıyır. Ərazisini bərpa etdi və heç kim Azərbaycanı qınamadı. Dünyanın qanunu budur. Bizi Dağlıq Qarabağın Azərbaycanın tərkib hissəsi olmasına razı salmağa məcbur edəcəklər. Artıq heç bir şey bizdən asılı deyil, hər şey bitdi”.