Azərbaycan Respublikasında gənclərin cəmiyyətdə rolu və onların inkişafı dövlət siyasətinin əsas istiqamətlərindən birini təşkil edir. Bu sahədə həyata keçirilən məqsədyönlü və ardıcıl siyasətin təməli Ulu Öndər Heydər Əliyev tərəfindən qoyulmuşdur. Məhz onun uzaqgörən siyasəti nəticəsində gənclər ölkənin sosial, siyasi və mədəni həyatında fəal qüvvəyə çevrilmişdir.
2 Fevral – Azərbaycan Gəncləri Günü müasir Azərbaycan tarixində mühüm əhəmiyyətə malik əlamətdar gündür. Bu günün təsis edilməsi 1997-ci il fevralın 2-də Bakıda keçirilmiş Azərbaycan gənclərinin I Forumu ilə bağlıdır. Həmin forum Ulu Öndər Heydər Əliyevin təşəbbüsü ilə keçirilmiş və ölkə gənclərinin problemlərinin, istək və arzularının dinlənilməsi baxımından mühüm platforma olmuşdur. Forumdan sonra 2 Fevral tarixi Azərbaycan Gəncləri Günü kimi rəsmiləşdirilmişdir.
Ulu Öndər Heydər Əliyev gəncləri Azərbaycanın gələcəyi, müstəqil dövlətçiliyimizin təminatçısı hesab edirdi. O, çıxışlarında dəfələrlə vurğulayırdı ki, ölkənin sabahı bu gün yetişən gənclərin bilik və dünyagörüşündən asılıdır. Buna görə də gənclərin milli-mənəvi dəyərlərə sadiq, vətənpərvər, savadlı və müasir düşüncəli ruhda tərbiyə olunması Heydər Əliyevin gənclər siyasətinin əsas məqsədlərindən biri olmuşdur.
Ulu öndər Heydər Əliyevin gənclər siyasətinin əsas istiqamətləri gənclərin təhsilinin inkişaf etdirilməsi, onların sosial müdafiəsinin gücləndirilməsi, istedadlı gənclərin üzə çıxarılması və cəmiyyətin idarə olunmasında fəal iştirakının təmin edilməsindən ibarət idi. Bu siyasət çərçivəsində gənclərin xarici ölkələrdə təhsil almasına şərait yaradılmış, onların elmi və yaradıcı fəaliyyətinə xüsusi diqqət yetirilmişdir.
Ulu Öndər gənclərin yalnız bilikli deyil, eyni zamanda yüksək mənəvi keyfiyyətlərə malik olmasını vacib sayırdı. O hesab edirdi ki, milli dəyərlərə bağlı olmayan, tarixini və mədəniyyətini bilməyən gənclik sağlam gələcək qura bilməz. Bu baxımdan gənclərin tarixə, milli irsə və dövlətçilik ənənələrinə hörmət ruhunda yetişdirilməsi gənclər siyasətinin əsas prinsiplərindən biri olmuşdur.
Bu siyasətin nəticəsi olaraq Azərbaycan gəncliyi qısa müddətdə cəmiyyətin fəal üzvünə çevrilmiş, ölkənin ictimai-siyasi həyatında mühüm mövqelər tutmuşdur. Gənclər dövlət idarəçiliyində, elm, təhsil, idman və mədəniyyət sahələrində öz bacarıqlarını nümayiş etdirmişlər.
Bu gün Ulu Öndər Heydər Əliyevin müəyyən etdiyi gənclər siyasəti Azərbaycan Respublikasının Prezidenti İlham Əliyev tərəfindən uğurla davam etdirilir. Gənclərin inkişafı məqsədilə müxtəlif dövlət proqramları həyata keçirilir, onların məşğulluğu, sosial rifahı və potensialının reallaşdırılması üçün geniş imkanlar yaradılır. Eyni zamanda gənclərin beynəlxalq arenada Azərbaycanı layiqincə təmsil etməsi üçün şərait təmin olunur.
Azərbaycan gəncliyi bu etimadı doğruldaraq ölkənin inkişafı və təhlükəsizliyi naminə hər zaman ön sıralarda olmuşdur. Xüsusilə 44 günlük Vətən müharibəsində gənclərimizin göstərdiyi şücaət, qəhrəmanlıq və fədakarlıq onların vətənpərvər ruhda yetişdiyini bir daha sübut etmişdir. Bu qələbədə gənclərin rolu əvəzsizdir.
2 Fevral – Azərbaycan Gəncləri Günü gənclərə olan dövlət qayğısının, Ulu Öndər Heydər Əliyevin gənclərə verdiyi yüksək dəyərin təcəssümüdür. Bu əlamətdar gün gənclərin ölkənin gələcəyindəki məsuliyyətini bir daha xatırladır və onları daha böyük nailiyyətlərə ruhlandırır.
Nəticə etibarilə, Ulu Öndər Heydər Əliyevin əsasını qoyduğu gənclər siyasəti bu gün də uğurla davam etdirilir və Azərbaycan gəncliyi müstəqil dövlətimizin inkişafında aparıcı qüvvə olaraq çıxış edir. 2 Fevral – Azərbaycan Gəncləri Günü bu siyasətin tarixi və mənəvi əhəmiyyətini bir daha nümayiş etdirir.
Bakıxanov qəsəbəsi, 107 nömrəli tam orta məktəbin
tarix müəllimi Türkan Mehdiyeva
