Respublika Neyrocərrahiyyə Xəstəxanasının direktoru,
Fərhad Həsənov

Azərbaycan xalqı üçün dekabr ayı təkcə təqvimdə bir tarix deyil, dərin duyğuların, ehtiramın və minnətdarlığın yaşandığı bir məqamdır. Dekabrın 12-i Azərbaycan xalqının ümummilli lideri, müasir dövlətçiliyimizin qurucusu Heydər Əliyevin anım günüdür. Bu gün yalnız xatırlama deyil, həm də bu böyük şəxsiyyətin Azərbaycan tarixində qoyduğu əvəzsiz izlərin bir daha dəyərləndirildiyi, onun siyasi irsinin ölkəmizin bütün sahələrində yaşadığını göstərən müqəddəs bir gündür.

Hər bir xalqın taliyi, hər bir millətin gələcəyi onun yetişdirdiyi böyük şəxsiyyətlərin düşüncəsi, iradəsi və uzaqgörənliyi ilə müəyyən olunur. Məhz buna görə də ümummilli lider Heydər Əliyev adı Azərbaycan xalqının tarixində silinməz şəkildə yazılmışdır. O, çətinliklər, təlatümlər və sınaqlarla dolu dövrlərdə Azərbaycanı tarixin sərt küləklərindən qorumuş, dövlətimizi məhv olmaq təhlükəsindən xilas etmiş, xalqımızın milli varlığını, azərbaycançılıq ideyasını yaşatmışdır.

Heydər Əliyev təkcə bir siyasi lider deyil, bütöv bir epoxanın yaradıcı simasıdır. Onun hakimiyyəti dövründə ölkəmiz məhv olmaqdan qurtulmuş, qarşısında geniş inkişaf yolları açılmış, dövlətçilik ənənələri bərpa edilmişdir. Bu proseslər yalnız bir liderin güclü intellekti, iradəsi və xalqına sonsuz sədaqəti sayəsində mümkün olmuşdur.

Ulu öndər bütün həyatı boyu Azərbaycan naminə çalışmış, xalqın təhlükəsizliyini, rifahını və gələcəyini hər şeydən üstün tutmuşdur. Onun siyasi xətti məhz bu prinsiplərə əsaslanırdı. Azərbaycanı dünyada tanıdan, nüfuzunu artıran, ölkəni beynəlxalq münasibətlər sistemində sabit və etibarlı tərəfdaş kimi mövqeləndirən məhz Heydər Əliyev məktəbi olmuşdur.

Azərbaycanın siyasi, iqtisadi və sosial həyatının bütün sahələrində Heydər Əliyevin uzaqgörənliyi bu gün də özünü qabarıq şəkildə göstərir. Dövlət idarəçiliyində yaratdığı model, milli inkişaf strategiyası və azərbaycançılıq məfkurəsi bu gün müstəqilliyimizin əsas dayağıdır. Onun diktə etdiyi sabitlik, təhlükəsizlik və inkişaf kursu müasir Azərbaycanın təməl prinsipləri kimi yaşayır və yaşamağa davam edir.

Heydər Əliyevin siyasi irsi tükənməz bir xəzinədir. Bu irsi ən yüksək səviyyədə davam etdirən dövlət başçısı İlham Əliyev ulu öndərin gərgin zəhmətlə qurduğu dayaqlar üzərində inkişaf etmiş güclü Azərbaycanı yeni zirvələrə aparır. Bu, ölkənin həm daxili siyasətində, həm də beynəlxalq aləmdə artan nüfuzunda aydın şəkildə görünür.

İlham Əliyev ulu öndərin siyasi yolunu böyük qətiyyət və məsuliyyətlə davam etdirərək Azərbaycanın dünya miqyasında söz sahibinə çevrilməsinə nail olmuşdur. Bu gün Azərbaycan regionda və dünyada nüfuzlu, etibarlı, öz mövqeyi və qərarları ilə hesablaşılan bir dövlət kimi tanınır. Bu gücün əsasında Heydər Əliyevin formalaşdırdığı möhkəm dövlətçilik ideyası dayanır.

Müasir tariximizin ən şanlı səhifələrindən biri məhz İlham Əliyevin rəhbərliyi ilə əldə olunan böyük Zəfərdir. Torpaqlarımızın azadlığı uğrunda gedən mübarizədə Azərbaycan xalqının birliyi, Ordumuzun gücü və Ali Baş Komandanın qətiyyəti sayəsində Qarabağ azad edilmişdir. Bu Zəfərin mənəvi kökləri də Heydər Əliyevin illər əvvəl yaratdığı dövlətçilik strategiyasına söykənir.

Şuşanın azad olunması xalqımızın taleyində dönüş nöqtəsi olmaqla yanaşı, həm də Heydər Əliyev ideyalarının real təcəssümüdür. Şuşa Fatehi İlham Əliyevin rəhbərliyi ilə bu gün həmin müqəddəs torpaqlarda həyat yenidən başlayır, quruculuq işləri genişlənir, qayıdışın coşqusu hər gün artır.

Bu gün Qarabağda tikinti və bərpa işləri davam edir, şəhərlərimiz, kəndlərimiz yenidən canlanır, yollar çəkilir, evlər tikilir, həyat öz axarına qayıdır. Bu proseslər yalnız müstəqil, güclü və iradəli bir dövlətin siyasətinin nəticəsidir. Həmin siyasətin təməlində isə Heydər Əliyevin düşüncəsi, milli məfkurəsi və dövlətçilik ideologiyası dayanır.

Azərbaycanın müstəqilliyi, dövlətçiliyinin möhkəmlənməsi və müasir dövlətin qurulması Heydər Əliyevin ən böyük əsəridir. O, müstəqil Azərbaycan ideyasını reallığa çevirən memardır və bu gün ölkəmizin sürətli inkişafının hər bir detalında onun izi vardır. Bu səbəbdən də ölkəmizin gələcəyi üçün Heydər Əliyev siyasətinin davam etdirilməsi həyati zərurət olaraq qalır.

Ulu öndərin yaratdığı siyasi məktəb bu gün də bütün dövlət institutlarının işində əsas xətt kimi yaşamaqdadır. Onun dövlətə, xalqa və gələcəyə bağlılığı gənc nəsil üçün nümunə, idarəetmə mədəniyyəti üçün isə bənzərsiz model olaraq qalır. Azərbaycan cəmiyyətinin bütün təbəqələrində Heydər Əliyevə olan sevgi və minnətdarlıq dəyişməz olaraq davam edir.

Azərbaycan xalqı Heydər Əliyevin xalqına olan sevgisinin və xidmətinin əhəmiyyətini yaxşı bilir. Qədirbilən xalqımız onu daim ehtiramla anır, hər il bu günü böyük hörmətlə qeyd edir. Onun xatirəsi yalnız tarixdə deyil, xalqın qəlbində əbədi yaşayır.

Ulu öndərin adı Azərbaycan üçün bir dəyər, bir ideya, bir həyat fəlsəfəsidir. Onun ardınca gələn nəsillər bu dəyəri qorumağı özünə borc bilir. Azərbaycan xalqı Heydər Əliyevi təkcə keçmişin lideri kimi deyil, həm də gələcəyə aparan yolun mənəvi işığı kimi görür.

Hər il dekabr ayında bütün Azərbaycan xalqı bu böyük insanın ruhu qarşısında baş əyir, ona olan sevgisini və sədaqətini bir daha göstərir. Bu sevgi heç vaxt azalmır, əksinə illər keçdikcə daha da böyüyür, daha da möhkəmlənir.

Ümummilli liderin xatirəsi qarşısında duyulan ehtiram yalnız rəsmi anım tədbirləri ilə məhdudlaşmır. Bu ehtiram xalqın gündəlik həyatında, dövlət quruculuğunda, gənclərin düşüncəsində, Azərbaycanın inkişaf yolunda da öz əksini tapır. Ulu öndərin xatirəsinə göstərilən sevgi əbədidir, çünki o, xalqın taleyinə yön verən böyük şəxsiyyət olmuşdur.

Bu gün onun irsi ilə yaşayan Azərbaycan daha güclü, daha qətiyyətli və daha inamlı addımlarla irəli gedir. Heydər Əliyevin işıqlı ideyaları bu inkişafın mayakıdır, bu millətin birlik rəmzidir.

Azərbaycan xalqı böyük liderinin xatirəsini daim uca tutur, onun qurduğu dövlətə sahib çıxır və onun ideyalarını gələcəyə daşımaqla öz minnətdarlığını ifadə edir. Heydər Əliyev yaşayan bir tarixdir, onun xatirəsi isə əbədi bir dəyər olaraq hər birimizin qəlbində yaşayır.

Azərbaycanın hər uğurunda, hər nailiyyətində, hər inkişafa yönəlmiş addımında ulu öndərin nəfəsi duyulur. Bu nəfəs bizi birliyə, gücə, sabitliyə və daha parlaq gələcəyə aparır.

Bu gün – bu müqəddəs anım günündə xalqımız bir daha ulu öndər Heydər Əliyevin xatirəsini ehtiramla yad edir, onun Azərbaycan naminə yaratdığı böyük dəyərləri qəlbində yaşadır. Bu sevgi həmişə yaşayacaq, nəsildən-nəslə keçəcək və heç vaxt tükənməyəcək.

Ulu öndər Heydər Əliyevin ruhu qarşısında baş əyir, onun müqəddəs xatirəsini dərin hörmətlə yad edirik. Azərbaycan xalqının sevgisi və ehtiramı daim onunladır və bu əbədi olaraq belə qalacaqdır.