Sosial ədalət prinsipi hər bir müasir dövlətin əsas dayaqlarından biri hesab olunur. Bu prinsip, cəmiyyətin bütün üzvlərinin bərabər hüquqlara və imkanlara malik olmasını təmin etməyi qarşıya məqsəd qoyur. Əgər bir dövlətdə sosial ədalət təmin olunmazsa, orada nə azadlıq, nə də sabitlik mövcud ola bilər. Sosial ədalət həm siyasi, həm iqtisadi, həm də mənəvi sahələrdə özünü göstərməlidir. Bu, təkcə maddi nemətlərin bölüşdürülməsi ilə bağlı deyil, həm də insanların dəyərinə, əməklərinə və hüquqlarına hörmətlə yanaşmaq deməkdir.
Ədalətli cəmiyyət o zaman mümkündür ki, orada hər bir fərd öz potensialını reallaşdırmaq üçün eyni imkanlara malik olsun. Dövlət bu istiqamətdə sosial proqramlar, təhsil və səhiyyə islahatları vasitəsilə vətəndaşlarının rifahını təmin etməlidir. Eyni zamanda, qanun qarşısında bərabərlik prinsipi qorunmalı, korrupsiya və ayrı-seçkilik hallarına qarşı ciddi mübarizə aparılmalıdır. Sosial ədalətin qorunması, həmçinin zəif təbəqələrin müdafiəsini və onların cəmiyyətin aktiv üzvünə çevrilməsini tələb edir.
Bu prinsipin kökündə dayanır insanın ləyaqətinə hörmət. Əgər bir insan öz əməyinə görə layiqli qarşılıq alırsa, o, həm dövlətinə, həm də cəmiyyətinə qarşı məsuliyyət hiss edir. Sosial ədalət, eyni zamanda, insanları bir-birinə bağlayan mənəvi bir körpüdür. Ədalətin hökm sürdüyü yerdə insanlar arasında qarşılıqlı etimad, birlik və sülh hökm sürür. Ədalət pozulduqda isə, cəmiyyətdə parçalanma, sosial narazılıq və inamsızlıq yaranır.
Buna görə də sosial ədalət prinsipi yalnız dövlətin deyil, hər bir vətəndaşın həyat fəlsəfəsinin bir hissəsi olmalıdır. Hər kəsin borcudur ki, cəmiyyətdə ədalətin bərqərar olması üçün öz töhfəsini versin. Ədalətə sadiq olmaq – vətəndaş məsuliyyətinin ən yüksək formasıdır. Ədalət olmayan yerdə inkişaf da, tərəqqi də möhkəm ola bilməz. Bu prinsip əsasında qurulan dövlət və cəmiyyət uzunömürlü, sabit və ədalətli olacaqdır.

Bakıxanov qəsəbəsi, 107 nömrəli tam orta məktəbin
tarix müəllimi Qurban İbişli