Ötən gün baş verən helikopter qəzasında sağ qalan 2 nəfərdən biri Ramin Ədilovun vəziyyəti yaxşıdır.

Bunu Ölkə.Az-a açıqlamasında kapitanın atası Ramiz Ədilov deyib. O, oğlu ilə söhbət etdiyini, vəziyyətinin stabil olduğunu bildirib:

“Durumu stabildir. Allaha min şükürlər olsun. Hazırda həkim nəzarətindədir. Hadisədən saat yarım sonra mülayim formada mənə məlumat verdilər.Dünən 12:30-da xəbər tutdum. Qəzadan sonra oğlumu görmüşəm, səhər də telefonla danışmışıq. Hazırda onun evində, nəvələrimin yanındayam. Allah onu övladlarına bağışladı. Allah şəhidlərimizə də rəhmət eləsin. Ailələrinə səbr diləyirəm”.

Qeyd edək ki, 32 R.Ədilovla yanaşı qardaşı da Dövlət Sərhəd Xidmətində qulluq edir.

Xatırladaq ki, noyabrın 30-da Dövlət Sərhəd Xidməti “Qaraheybət” aviasiya poliqonunda təlim uçuşları zamanı qəzaya uğraması nəticəsində 14 nəfər şəhid olub, 2 nəfər yaralanıb.