Müsəlman dünyası müqəddəs Ramazan ayı ərəfəsindədir. Möminlərin on bir aydır səbirsizliklə gözlədikləri məqam gəlib çatır.
Hicri qəməri təqviminin doqquzuncu ayında - Ramazan ayında oruc tutmaq hər bir müsəlman üçün fərzdir. Ağıllı, həddi-büluğa çatmış, oruc tutmaq üçün üzrlü səbəbi olmayan hər bir mömin oruc tutmalıdır. Müsəlmanlar mübarək ay boyunca günün işıqlı vaxtında oruc tutub yemək-içməkdən uzaq qalacaqlar.

Dünyanın müsəlman ölkələrində Ramazan ayının başlama tarixi müxtəlifdir.

İnter.az xəbər verir ki, Qafqaz Müsəlmanları İdarəsinin verdiyi fətvaya əsasən bu il Ramazan ayı miladi təqvimi ilə Azərbaycanda aprelin 25-də başlayır.

Türkiyə, Səudiyyə Ərəbistanı, Qətər, Küveyt, Livan, Birləşmiş Ərəb Əmrlikləri, Yəmən, Bəhreyn və Əlcəzairdə Ramazan ayı aprelin 24-dən başlayır.

Misir, Fələstin, İran, İraq, İordaniya, Liviya, Tunis, Pakistan və Suriyada Ramazan ayının 1-i miladi təqvimlə aprelin 25-nə təsadüf edib.

Qeyd edək ki, İslam ölkələri ayparanın dünyanın hər hansı bir yerində deyil, öz ölkələrində görünməsini əsas götürür və bu səbəbdən Ramazan ayı və bayram günlərində fərqlilik yaşanır.