Azərbaycan xalqı hər il noyabrın 9-da böyük qürur və iftixar hissi ilə Dövlət Bayrağı Gününü qeyd edir. Bu tarixi gün Azərbaycanın dövlətçilik tarixində mühüm mərhələ olmaqla, milli suverenliyin, azadlığın və müstəqilliyin rəmzi kimi dəyərləndirilir.
1918-ci il noyabrın 9-da Azərbaycan Xalq Cümhuriyyətinin Nazirlər Şurasının qərarı ilə üçrəngli – mavi, qırmızı və yaşıl zolaqlardan ibarət olan, ortasında ağ aypara və səkkizguşəli ulduz təsviri yerləşdirilmiş dövlət bayrağı qəbul edildi. Bu bayraq təkcə bir dövlət rəmzi deyil, eyni zamanda milli kimliyimizin, ideallarımızın və azadlıq uğrunda mübarizəmizin təcəssümüdür.
Bayraqdakı mavi rəng türklüyü, qırmızı rəng müasirliyi və inkişafı, yaşıl rəng isə islam mədəniyyətinə mənsubiyyətimizi ifadə edir. Ağ aypara və səkkizguşəli ulduz isə milli-mənəvi dəyərlərimizin və müstəqillik əzminin rəmzidir.
Azərbaycan Xalq Cümhuriyyətinin süqutundan sonra bu müqəddəs rəmz uzun illər unudulmağa məhkum edilsə də, 1991-ci ildə Azərbaycanın müstəqilliyi bərpa edildikdən sonra üçrəngli bayrağımız yenidən dövlət rəmzi kimi ucaldıldı.
Azərbaycan Respublikasının Prezidenti Heydər Əliyevin 17 noyabr 1990-cı il tarixində Naxçıvan Muxtar Respublikasının Ali Məclisinin iclasında üçrəngli bayrağın yenidən rəsmi şəkildə qaldırılması barədə təşəbbüsü bu rəmzin tarixində dönüş nöqtəsi oldu. Daha sonra 1991-ci il oktyabrın 18-də qəbul edilmiş "Azərbaycan Respublikasının Dövlət Müstəqilliyi haqqında Konstitusiya Aktı" ilə bayrağımız dövlət rəmzi kimi təsdiqləndi.
2009-cu il noyabrın 17-də Prezident İlham Əliyevin sərəncamı ilə 9 Noyabr – Azərbaycan Respublikasının Dövlət Bayrağı Günü təsis edildi. Bu qərar dövlət rəmzlərinə, xüsusilə də bayrağa olan hörmətin və məhəbbətin təzahürü kimi mühüm əhəmiyyət daşıyır.
Azərbaycan Respublikasının Dövlət Bayrağı bu gün hər bir vətəndaşın qəlbində qürur mənbəyidir. O, Vətənimizin müstəqilliyini, ərazi bütövlüyünü və xalqımızın birliyini təcəssüm etdirir. Bayrağımız torpaqlarımızın azadlığı uğrunda şəhid olan qəhrəmanlarımızın qanı ilə daha da müqəddəsləşmişdir.
2020-ci il Vətən müharibəsində Azərbaycanın suverenliyi bərpa olunarkən, azad edilmiş torpaqlarımızda dalğalanan üçrəngli bayraq xalqımızın əzmini və gücünü bir daha nümayiş etdirdi. Bu hadisə tariximizə qızıl hərflərlə yazıldı və Dövlət Bayrağı Gününün mənasını daha da dərinləşdirdi.
Bu gün üçrəngli Azərbaycan bayrağı dünyanın bir çox ölkələrində dalğalanır, beynəlxalq arenada ölkəmizin müstəqil və güclü dövlət kimi tanınmasının simvoluna çevrilmişdir. Bayrağımız həm keçmişimizin şərəfli salnaməsini, həm də gələcəyə inamla baxan xalqın iradəsini əks etdirir.
9 Noyabr – Dövlət Bayrağı Günü xalqımız üçün sadəcə bir təqvim günü deyil, milli qürurun, dövlətçiliyin, birlik və vətənpərvərlik duyğularının təntənəsidir.
Üçrəngli bayrağımız daim ucalarda dalğalansın!

Milli Məclisin deputatı

Pərvanə Vəliyeva