Təqdimat zamanı Günel müəlim "Azərbaycanda neftin tarixi", "İkinci dünya müharibəsi zamanı Azərbaycan neftinin rolu","Neft daşları"və s. mövzularda çıxış edib.
1 Neft Qaz qrup tələbəsi Qasımzadə Rövşən "Şirvanda neft sənayesinin inkişafı " mövzusunda danışıb. Tədbirdə daha sonra "Əsrin müqaviləsi" ,"Azərbaycan nefti kinomatoqrafiyada" mövzularından bəhs edilib,videoçarxlar izlənilib . Kollecin Əməkdar Tarix müəllimi Mehran Əhməd qızı çıxış edərək Azərbaycanda Neft Strategiyası mövzusunda ətraflı məlumat verib. Sonda Samir Cəfərovun "Neftçilər mahnısı" səsləndirilib.Musiqi müəllimi Sevda Həsənovanın dəstəyi ilə hazırlanmış tədbir uğurla sona çatıb.
Ümummilli lider Heydər Əliyevin Anım gününə həsr olunmuş tədbir
12.XII. 2022-ci il tarixində Şirvan Dövlət İqtisadiyyat və Humanitar Kollecində Ulu Öndər Heydər Əliyevin anım gününə həsr olunmuş "Heydər Əliyev və Azərbaycan iqtisadiyyatı" mövzusunda Anım Günü tədbiri baş tutub. Tədbirdə kollecin müəllim kollektivi iştirak ediblər.
Dövlət himni səsləndirildikdən sonra Ulu öndər Heydər Əliyevin və Vətənin azadlığı uğrunda canından keçmiş Qəhrəman Şəhidlərimizin əziz xatirəsi bir dəqiqəlik sükutla yad olunub. Ümummilli Liderə həsr olunmuş film nümayiş olunduqdan sonra çıxış etmək üçün söz kollecin direktoru Barxudar Barxudarova verilib.O, Ulu öndər Heydər Əliyevin xalqa həsr olunmuş ömür yolundan bəhs edib. Sonra Kollecin iqtisadiyyat müəllimləri Elçin Məlikov "Heydər Əliyev və Azərbaycan İqtisadiyyatı", Günel Abbasova "Heydər Əliyev və Neft strategiyası" mövzusunda çıxış ediblər.
Rəsmi hissə bitdikdən sonra bədii hissə başlayıb.
Kollecin tələbələri: Elmira İbrahimova, Elminaz Gülməmmədova, Gülmirə Mikayılova, Aysu Qarayeva, Lamiyə Zaidova və Elnur Mahmudov ümummilli liderimiz Heydər Əliyevə həsr edilmiş şeirlər və mahnılar səsləndiriblər. Kollecin tərbiyə işləri üzrə direktor müavini-Aidə Əsədova və musiqi müəllimi Sevda Həsənovanın birgə təşkilatçılığı ilə təşkil olunmuş tədbir yüksək səviyyədə sona çatıb.
Şirvan Dövlət İqtisadiyyat və Humanitar Kollecinin direktoru Bərxudar Bərxudarov - Laçın-Xankəndi yolunda Azərbaycanın vətəndaş cəmiyyətinin fəallarının keçirdiyi etiraz aksiyası ciddi əsaslara söykənir. Etirazların əsas səbəbi Qarabağda Rusiya sülhməramlılarının müvəqqəti yerləşdiyi ərazilərdə təbii sərvətlərimizin qanunsuz istismarı və ekologiyaya ciddi ziyanın vurulmasıdır.
Rusiya sülhməramlı kontingentinin müvəqqəti yerləşdiyi Azərbaycan ərazilərində təbii sərvətlərin qeyri-qanuni istismarı, habelə ekoloji vəziyyətin pisləşməsi ilə bağlı ilkin monitorinq məqsədilə Azərbaycanın dövlət qurumlarının nümayəndələrinin və mütəxəssislərin əraziyə girişinə maneçilik törədilməsi səbəbindən Azərbaycan vətəndaş cəmiyyəti nümayəndələrinin və ekoloqların etiraz aksiyası təşkil olunub. Bütün faydalı qazıntı yataqları, o cümlədən “Qızılbulaq” qızıl və “Dəmirli” mis-molibden yataqlarına yerində baxış, qanunsuz istismarın dayandırılması, müxtəlif istiqamətlər üzrə monitorinqin aparılması, ətraf mühitə, yeraltı və yerüstü su mənbələrinə potensial zərərin və risklərin qiymətləndirilməsi, dəymiş zərərin nəticələrinin aradan qaldırılması məsələləri üzrə işçi qrup yaradılıb. Məlumdur ki, dekabrın 3-dən etibarən Azərbaycan Respublikası İqtisadiyyat Nazirliyi, Ekologiya və Təbii Sərvətlər Nazirliyi, İqtisadiyyat Nazirliyi yanında Əmlak Məsələləri Dövlət Xidməti və “AzerGold” Qapalı Səhmdar Cəmiyyətinin mütəxəssislərindən ibarət heyət Rusiya sülhməramlı kontingentinin müvəqqəti yerləşdiyi Azərbaycan ərazilərində faydalı qazıntı yataqlarının qanunsuz istismarı, bundan irəli gələn ekoloji və digər törəmə fəsadlar ilə bağlı sülhməramlı kontingentin komandanlığı ilə danışıqlar aparıblar. Lakin Qarabağdakı separatçılar monitorinqin aparılmasına əngəl törədib, sülhməramlılar isə onların qarşısını almaq üçün heç bir addım atmayıb.
Hazırda Laçın yolu azərbaycanlı etirazçılar tərəfindən deyil, Rusiya Federasiyasının sülhməramlı kontingenti tərəfindən bağlanıb. Azərbaycan vətəndaş cəmiyyəti nümayəndələri sadəcə talan edilmiş təbii sərvətlərin qanunsuz daşınmasının qarşısını almağa çalışır.
Ermənistan hökumətinin Azərbaycan əraziləri daxilində baş verən hadisələrə verdiyi şərhlər ölkəmizə qarşı ərazi iddialarının hələ də davam etdiyinin göstəricisidir. Bir məqamı da xüsusi vurğulamaq lazımdır ki, Ermənistan öz qeyri-qanuni iqtisadi fəaliyyəti ilə beynəlxalq konvensiyaların tələblərini kobud şəkildə pozur. Bu cür cinayətlər Ermənistan üçün hüquqi məsuliyyət yaradır. Xatırladaq ki, ATƏT, BMT-nin İnkişaf Proqramı (UNDP), Ətraf Mühit Proqramı (UNEP), Avropa Şurası Parlament Assambleyası (PACE) tərəfindən qəbul olunmuş hesabatlarda və qətnamələrdə işğal dövründə ərazilərimizdə həyata keçirilmiş qeyri-qanuni iqtisadi fəaliyyət və təbii sərvətlərin qanunsuz istismarı faktları qeydə alınıb. Bundan əlavə, Azərbaycan və Rusiya prezidentlərinin, Ermənistanın baş nazirinin imzaladığı 10 noyabr 2020-ci il tarixli Bəyanatın müddəaları Ermənistan tərəfindən yerinə yetirilmir. Bəyanatın 4-cü bəndinə zidd olaraq erməni silahlı qüvvələri hələ də Azərbaycan ərazilərindən çıxarılmayıb, 6-cı bəndinə zidd olaraq Laçın yolundan həm hərbi təxribatlar, həm də qeyri-qanuni iqtisadi fəaliyyət üçün istifadə olunur, eləcə də 9-cu bənd də yerinə yetirilməyib. Bu bəndə görə bölgədə bütün nəqliyyat kommunikasiya yolları açılmalıdır. Lakin Ermənistan kommunikasiyaların açıqlmasına maneçilik törədir.
Hər zaman haqqın, ədalətin tərəfində olan, bütün məsələlərin beynəlxalq hüququn norma və prinsipləri əsasında həllinə çalışan, dünyaya sülh, təhlükəsizlik, əməkdaşlıq çağırışlarını edən Azərbaycan 44 günlük İkinci Qarabağ müharibəsində tarixi Zəfəri ilə bir daha sübut etdi ki, ədalət və beynəlxalq hüquq əsasdır, onların tətbiqi üçün vahid mexanizm olmalıdır.
