Özəl klinika xəstənin yaxınlarını aldatmaqda və onlara mənəvi zərər vurmaqda ittiham edilir.Minval.info xəbər verir ki, Ağcəbədi rayonu Şənlik kənd sakini 15 yaşlı Sevda Məmmədovanın Baku Medical Plazada bu gün təyin olunan əməliyyata girə bilmədiyi söylənilir. Buna səbəb kimi sözügedən klinikanın verdiyi vədin üzərində durmaması göstərilir.
Bu barədə S.Məmmədovanın xalası qızı Ayşən Ayxan bildirir və özəl xəstəxananı yaxınlarını aldatmaqda günahlandırır:
“Xalamgil klinikanın Babək filialının həkimi Vüsal Mahmudovla danışıblar, o bildirib ki, xəstənin ayaq vətərlərində problem var və bu aradan qaldırıldıqdan sonra Sevdanın səhhəti normala qayıdacaq. Onlar kənddəki torpaqlarını satıb, pulu götürüb Bakıya gəliblər. Xəstəxanadan deyilib ki, diaqnoz yanlış qoyulub. Sən demə, Sevdanın sümükləri deformasiyaya uğrayıbmış. Klinika əvvəlcə məbləği 4000 manata danışıb və əməliyyatın vaxtı dəqiqləşdirmişdi. İndi isə xəstəxanadan deyilib ki, əməliyyat 12000 manat qarşılığında həyata keçirilir. Təsəvvür edirsiniz? Sən uşağını psixoloji bu əməliyyata hazırla, çox çətinliklə pul tap və son anda qiyməti qaldırsınlar”.
A.Ayxan bildirib ki, Sevda 15 ildir yerimə qabiliyyətindən məhrumdur: “Müalicə olunsa da, çox az təsiri olub. Valideynlərinin ümidi bu və bundan sonra keçiriləcək əməliyyatlara idi. Onu da belə əllərindən alırlar”.
Minval.info məsələ ilə bağlı Baku Medical Plaza xəstəxanasıyla əlaqə saxladı. Klinikanın mərkəz filialından bildirildi ki, iddia araşdırılacaq və məlumat veriləcək.
Təxminən bir saat sonra Baku Medical Plazanın mərkəzi xəstəxanasının baş həkimi Lalə Şəkərova geri dönüş edərək saytımızla əlaqə saxladı:
“Biz məsələni araşdırdıq. Xəstənin anasıyla danışılıb və ona bildirilib ki, övladı iflicdir. Bu əməliyyat 15 min manata həyata keçirilir. Xanım o qədər imkanlarının olmadığını və 2000 manata gücünün çatacağını deyib. Bu qiymətə isə həyata keçiriləcək əməliyyatın faydası yoxdur. Həkim də güzəşt edərək, 10 min manata razılaşıb. Bu əməliyyatın 2000 manata həyata keçiriləcəyi ilə bağlı heç bir vəd verilməyib”.
