V çağırış Milli Məclisin fəaliyyətə başlamasından 3 ilə yaxın vaxt ötür.

Hazırda Azərbaycan Parlamentində 125 deputat yeri nəzərdə tutulub ki, onlardan bəzisi icraedici hakimiyyətdə təmsil olunmaları, digərləri isə dünyasını dəyişmələri səbəbindən mandatları ləğv edilib. 25 deputat isə ilk dəfə olaraq ali qanunverici orqana mandat qazanıb.

AZXEBER.COM yeni seçilən deputatlarla bağlı araşdırmalara başlayır.

Hər gün xəbər istehsalı və yayımı ilə məşğul olan media nümayəndələri deputatların fəaliyyəti ilə bağlı təəssüratlarını portalımıza bölüşürlər.

Fəaliyyətini ictimai müzakirəyə çıxardığımız ilk deputat - 63 saylı Sabirabad birinci seçki dairəsini təmsil edən Elçin Quliyevdir.

Sualımız belədir: Elçin Quliyev adlı deputat tanıyırsınızmı və onun deputat kimi fəaliyyətini necə qiymətləndirirsiniz?

Elşad Paşasoy ("Yeni Müsavat” qəzetinin parlament müxbiri): Parlament jurnalisti olduğuma görə, Elçin Quliyevi tanıyıram. Bildiyim qədər hakim partiyanın üzvüdür, Sabirabadın deputatıdır. Adətən deputatlar bu ifadəni qəbul etmirlər. Belə arqument səsləndirilir ki, mən səçicilərimlə aktiv işləyirəm, onlar razıdır və s. Milli Məclisin plenar iclaslarında aktivliyini müşahidə etməmişəm, ola bilsin seçicilərlə sıx ünsiyyəti var. Bu barədə bir söz deyə bilmərəm.

Aqil Ələsgər (Yenicag.az portalının baş redaktoru): Onu tanımıram. Yəqin aktiv deputat olsaydı, tanıyardım. Mənim üçün bir legitim Elçin Quliyev var, o da Sərhəd Xidmətinin rəisi, general-polkovnik Elçin Quliyevdir. Başqa Elçin Quliyev adında və soyadında məmur və ya deputat tanımıram.

Anar Niftəliyev (Axar.az portalının baş redaktoru): Düzünü deyəcəm, mən o adda və soyadda deputatın yalnız adını eşitmişəm. Niyə yalan danışım?! Deyim ki, tanıyıram, çox aktivdir, çox fəaldır?! Axı o belə deyil. Belə olsaydı hər gün xəbərlə əlləşən bir qələm adamı kimi mən də onu tanıyardım. Mən isə onu tanımıram.

Fərid Şahbazlı (Editor.az portalının baş redaktoru): Çox yüksək aktivliyi var desək, obyektivlikdən kənar olar. Lakin passiv deputat kimi də qiymətləndirmək düzgün deyil. Seçicilərlə aktiv görüşləri, rayon tədbirlərində fəal iştirakı ilə bağlı xəbərlərə dəfələrlə şahidlik etmişəm. Sosial şəbəkələrdə də aktivdir və bütün bunları nəzərə alıb, fəaliyyətini qənaətbəxş hesab edirəm.

Səbuhi Abbasov (7news.az portalının baş redaktoru): Şəxsən tanıyıram. Kifayət qədər mədəni, savadlı və alicənab bir deputatdır. Milli Məclisdəki fəaliyyətinə gəldikdə isə buna seçicilər daha dəqiq rəy verə bilərlər. Bu barədə məndə hər hansı informasiya yoxdur. Bildiyim qədər ona müraciət edənlərə münasibətdə həssas deputatdır. Başqa elə bir söz deyə bilmərəm.

Toğrul Allahverdili (İnterpress.az portalının baş redaktoru): Xeyr, tanımıram. Çox təəssüf ki, bu belədir. Əgər bir media mənsubu olaraq onu tanımıramsa, bunun günahı məndə yox, onun özündədir. Mətbuata açıq, fəal deputat olsaydı, məndə onu tanımış olardım. Görünür fəallıq onun özünə də lazım deyil və daha ciddi işlərlə məşğuldur.