“Türkiyədə bir dərman 10 manatdır, başqa bir dövlətdə 5 manat. Bizdə isə dərman qiymətlərini göyün kəlləsinə qaldırıblar”.Bu sözləri açıqlamasında Azərbaycan Tibb Universitetinin dosenti, tanınmış doktor Rəşid Mahmudov deyib.
O, apteklərdə bəzi dərmanların tapılmaması və ya qonşu ölkələrdən bir neçə dəfə baha olması ilə bağlı narazılıqlara da münasibət bildirib:
“Səbəbini bilmirəm. Adicə 1.50 manatlıq “Benzatin” dərmanını bizdə apteklər 39-40 manata satırlar. Niyə bu qiymətə satırlar bilmirəm, kim nə istəyir edir. Soruşmaq lazımdır ki, niyə belə edirsiniz? Özləri bahalaşdırıb pul yığırlar. Bunlar da belə pul yığırlar. Heç kəs onların başının üstündə durub demir ki, bu dərman bura neçəyə gəlib. Özləri qiyməti artırırlar. Soruşmaq lazımdır ki, bu milləti niyə soyursunuz, məqsədiniz nədir. Belə şey olar?!”, - deyə o söyləyib.
Qeyd edək ki, Bakıdakı apteklərdə 75 manat 66 qəpiyə satılan “Qalvus Met” adlı dərman Türkiyədə qat-qat ucuz olması sosial şəbəkələrdə müzakirələrə səbəb olub.
Xatırladaq ki, qiymət artımı müşahidə olunan tək dərman preparatı bu deyil. Daha əvvəl də belə hallar aşkar olunmuşdu. Belə ki, sentyabr ayında apteklərdə yodun tapılmaması daha sonra onun qiymətinin kəskin artması ilə nəticələnmişdi. Əvvəllər 40 qəpiyə satılan yod hazırda 1.20 manatadır.
