Rövşən Əhmədov: Azərbaycan xalqının dövlətçilik ənənələri hələ qədim dövrlərdən mövcud olmuşdur. Bu gün də müstəqil bayrağa malik olmaq xalqımızın mənəvi haqqıdır. Üçrəngli bayrağımız Azərbaycan xalqının yenilməz mənəviyyatının şanlı təcəssümüdür. Məhz mübarizlik və yenilməzlik ruhu sayəsində tarixin bütün dönəmlərində Azərbaycan dövlətçiliyi öz kökləri ilə keçmişinə bağlı olub, tarixi ilə birgə yaşamağı, keçmişi ilə bu gününün vəhdətini yaratmağı bacarıb. Ona görə də dövlətçiliyimiz milli siyasət və ideologiyanın ən mühüm simvolu olan tarixi bayraq ənənəsində də özünün maddi, mənəvi və siyasi mədəniyyətinin əsas özəlliklərini, başlıcası isə ölməz milli ruhunu daim yaşatmaqdadır.
Ulu Öndər Heydər Əliyev hər bir məsələdə olduğu kimi milli bayrağa münasibətdə də cəsarətli addım atdı. 1990-cı il noyabrın 17-də Naxçıvan Muxtar Respublikası Ali Sovetinin Ulu Öndər Heydər Əliyevin sədrlik etdiyi sessiyasında ilk dəfə 1918-ci ildə Azərbaycan Xalq Cümhuriyyəti tərəfindən qəbul olunmuş Azərbaycan milli bayrağı qaldırıldı və Naxçıvan Muxtar Respublikasının dövlət atributları müəyyən edildi. Kommunist partiyası və Sovet hakimiyyətinin mövcud olduğu bir zamanda Naxçıvan Muxtar Respublikasının adından “sovet sosialist” sözlərinin çıxarılması barədə qərar qəbul edildi.
Dahi şəxsiyyətin özünün işləyib hazırladığı və Ali Məclisdə yekdilliklə qəbul olunan “Naxçıvan Muxtar Respublikasının Dövlət rəmzləri haqqında” tarixi Qərarda üçrəngli bayrağımızın Naxçıvan Muxtar Respublikasının Dövlət Bayrağı kimi təsis edilsi ilə yanaşı, bütövlükdə Azərbaycan SSR-in Dövlət rəmzi kimi təsis edilməsi barədə qanunvericilik təşəbbüsü irəli sürüldü.
Müstəqilliyimizin bərpasından keçən dövr ərzində ölkəmizdə milli atributlarımıza hər zaman böyük sevgi ilə yanaşılıb. Dövlətçiliyimizin, milli dəyərlərimizin daşıyıcısı olan müqəddəs bayrağımıza ümummilli ehtiramın formalaşdırılması isə Azərbaycan Respublikasının Prezidenti İlham Əliyev tərəfindən həyata keçirilən milli siyasətin aparıcı istiqamətidir.
Ən müqəddəs rəmzlərdən olan bayraq millətin varlığının, mövcudluğunun sübutu, müstəqil dövlət qurmaq və ona sahib çıxmaq bacarığının əsas göstəricisidir. Odur ki, özünütəsdiq simvolu olan bayraq bütün dünyada qürur və güvənc yeri sayılır. Bayraq həm də dövlətin və xalqın kimliyinin, apardığı azadlıq mücadiləsinin, təfəkkür və düşüncə tərzinin ən real ifadəsidir. Məhz bu baxımdan xalqımızın azadlığını, suverenliyini, öz istiqlalı uğrunda apardığı mübarizəni, milli kimliyini tərənnüm edən üçrəngli bayrağımız milli qürurumuzdur.
Rövşən Əhmədov, YAP Ağcabədi rayon təşkilatının sədri.