Mənzil İnşaatı Dövlət Agentliyinin (MİDA) birinci layihəsi olan Yasamal Yaşayış Kompleksində ilk 260 mənzilin satışına may ayının 7-də başlanılmışdı. Amma məlum olduğu kimi, satış prosesi planlaşdırılan vaxtda reallaşmadı. Odur ki, MİDA Yasamal Yaşayış Kompleksində ilk mənzillərin seçimini yenidən təşkil etməyi qərara aldı və bununla bağlı ictimaiyyətə məlumat verildi. Bəs satış nə vaxt başlayacaq? Yenidən təşkil ediləcək satış prosesi zamanı oxşar problemin yaranma ehtimalı varmı? Yaxud MİDA oxşar problemlərin yaranmaması üçün hansı qabaqlayıcı tədbirlər görür?

Xəzər TV-nin "Gündəm" proqramının qonağı olan Mənzil İnşaatı Dövlət Agentliyinin strateji planlaşdırma və təhlil şöbəsinin müdiri Fərman Qurbanlı satış prosesi zamanı yaranan problemlərin detallarını açıqlayıb. O, həmçinin hazırda prosesin nə yerdə olduğunu və qarşıdakı planları barədə ətraflı məlumat verib, eyni zamanda, səsləndirilən bəzi iddialara münasibət bildirib.