Rayon rəhbəri tərəfindən növbəti dəfə vətəndaşların müraciətləri dinlənilib
Tərtər Rayon İcra Hakimiyyətinin Başçısı Müstəqim Məmmədov İcra Hakimiyyətinin inzibati binasında növbəti dəfə rayon sakinlərini qəbul edərək, onların müraciətlərini dinləyib.
Şəhid ailələri və qazilər növbədənkənar qəbul edilib, onların problemlərinə həssaslıqla yanaşılıb.
Sakinlər tərəfindən edilən müxtəlif məzmunlu müraciətlər rayon rəhbəri tərəfindən diqqətlə dinlənilib, icra hakimiyyətinin səlahiyyətlərinə aid müraciətlər qanun çərçivəsində həll olunub, digər müraciətlərlə bağlı isə vətəndaşlara müvafiq izahatlar verilib, vətəndaş məmnunluğu təmin olunub.
Qəbulda vətəndaşlar ölkəmizdə həyata keçirilən islahatlara, onların müraciətlərinə həssaslıqla yanaşıldığına görə möhtərəm Prezident cənab İlham Əliyevə və Birinci vitse-prezident Mehriban xanım Əliyevaya öz minnətdarlıqlarını bildiriblər.
Rayon rəhbəri 70 yaşlı şəhid atası İsmayıl Həsənovu ad günü ərəfəsində ziyarət edib
Tərtər Rayon İcra Hakimiyyətinin başçısı Müstəqim Məmmədov birinci Qarabağ müharibəsi şəhidi-Həsənov Zəka İsmayıl oğlunun atası İsmayıl Həsənovla ad günü ərəfəsində görüşüb, şəhid atasını 70 illik yubileyi münasibəti ilə təbrik edərək ona səmimi arzularını çatdırıb. İcra başçısı bütün şəhid valdeyinlərinin baş tacımız olduğunu bildirib. Şəhid atasına rayon icra hakimiyyəti tərəfindən təşəkkürnamə və gül dəstəsi təqdim edib, ailənin qayğıları ilə maraqlanıb.
Şəhid Həsənov Zəka İsmayıl oğlu 1978-ci il Fevral ayının 6-da Tərtər rayonunun Xoruzlu kəndində anadan olub. Orta təhsilini həmin kənd orta məktəbində aldıqdan sonra 1996-cı ilin oktyabr ayında rayon hərbi komissarlığı tərəfindən Milli Ordu sıralarına həqiqi hərbi xidmətə çağırılıb. 1998-ci il aprel ayının 4-də rayon hərbi komissarlığı tərəfindən yenidən hərbi xidmətə göndərilib. Həmin vaxtdan N saylı hərbi hissədə xidmət etməyə başlayıb. Bu hərbi hissənin əsgəri kimi Gədəbəy rayonunda xidməti borcunu yerinə yetirib. 1999-cu il mart ayının 8-də Qaravəllər kəndi istiqamətində gedən döyüşlərdə şəhid olub. Subay idi.
Şəhid atası bütün şəhid ailələrinə, qazilərə göstərilən diqqət və qayğıya görə Azərbaycan Respublikasının Prezidenti cənab İlham Əliyevə və Birinci vitse prezident Mehriban xanım Əliyevaya öz minnətdarlığını bildirib.
“Heydər Əliyev İli-2023”: YAP Tərtər Rayon Təşkilatının 30 illik yubileyi qeyd olunub
Tərtər Rayon İcra Hakimiyyətinin və YAP rayon təşkilatının birgə təşkilatçılığı ilə “Heydər Əliyev İli” çərçivəsində YAP rayon təşkilatının 30 illik yubileyi qeyd olunub.
Tədbirdə Tərtər rayon İcra Hakimiyyətinin başçısı Müstəqim Məmmədov, YAP rayon təşkilatının sədri Eldar Əsədov, idarə, müəssisə, təşkilat rəhbərləri, İƏD üzrə nümayəndələr, Ərazi Partiya təşkilat sədrləri və partiya fəalları iştirak ediblər.
Tədbir iştirakçıları əvvəlcə Ulu Öndər Heydər Əliyevin abidəsini və Şəhidlər Abidə Kompleksini ziyarət edərək, abidələrin önünə gül-çiçək dəstələri düzüb, onların xatirələrini ehtiramla yad ediblər.
Sonra tədbir rayon icra hakimiyyətinin akt zalında davam etdirilib. Tədbir iştirakçıları öncə Ümummilli Lider Heydər Əliyevin, torpaqlarımızın suverenliyi uğrunda canlarını fəda etmiş şəhidlərin və dünyasını dəyişmiş YAP üzvlərinin xatirələrini bir dəqiqəlik sükutla yad ediblər.
Tədbirdə çıxış edən Tərtər rayon İcra Hakimiyyətinin başçısı Müstəqim Məmmədov rayon təşkilatının üzvlərini səmimi qəlbdən təbrik edərək, onlara işlərində uğurlar arzulayıb.
Rayon rəhbəri Azərbaycan xalqının ən ağır, taleyüklü dövründə ümummilli lider Heydər Əliyev tərəfindən Yeni Azərbaycan Partiyasının təsis edilməsindən və cəmiyyətin aparıcı, intellektual, vətənpərvər kəsiminin YAP-ın sıralarında birləşməsindən, Ulu Öndərin xalqın təkidli tələbi ilə yenidən hakimiyyətə qayıdışının tarixi əhəmiyyətindən geniş bəhs edib.
Bildirib ki, Yeni Azərbaycan Partiyasının ölkəmiz üçün çətin tarixi dövrdə yaranması heç kim üçün sirr deyil. Keçən 30 il ərzində partiyanın bugünkü inkişafının böyük səylərin, qətiyyətin nəticəsi olduğunu böyük əminliklə qeydə edə bilərik. Partiya sıralarında bütün kateqoriyadan olan insanların təmsil olunması isə onu deməyə əsas verir ki, YAP xalqın partiyasıdır.
İcra başçısı o dövrdəki ictimai-siyasi durumdan, Azərbaycanın vətənpərvər və ziyalı insanlarının nicat yolunu Ümummilli lider Heydər Əliyevin hakimiyyətə qayıtmasında görürdüklərindən, onların Ulu öndərə müraciət ünvanlamalarından, müraciəti ünvanlayan məşhur “91-lər”in öz tarixi missiyalarını şərəflə yerinə yetirmələrindən danışıb.
Bu müraciətə cavab olaraq Yeni Azərbaycan Partiyasının təsis konfransının keçirilməsindən 7 ay sonra YAP-ın iqtidar partiyasına çevrildiyini qeyd edib.
Ümumxalq partiyası olan Yeni Azərbaycan Partiyası Ulu öndər Heydər Əliyevin müəyyən etdiyi dövlətçilik və idarəetmə prinsiplərinə söykənərək müstəqil dövlətimizin qurulması yolunda çoxşaxəli fəaliyyət göstərib. Bu gün Ümummilli lider Heydər Əliyev tərəfindən əsası qoyulmuş inkişaf siyasəti partiyamızın Sədri, Prezident İlham Əliyev tərəfindən uğurla davam etdirilir. Bu gün Azərbaycan iqtisadi cəhətdən inkişaf etmiş, güclü sənaye və iqtisadi resurslara malik, dünya enerji bazarında söz sahibinə çevrilmiş, beynəlxalq siyasi arenada öz imzası olan, dünya ölkələrinin hesablaşmalı olduğu bir ölkəyə çevrilib. Prezident İlham Əliyevin yürütdüyü siyasət Azərbaycanın müttəfiqlərinin və dostlarının sayını artırdı, ölkəmizin beynəlxalq müstəvidə layiqli yerini möhkəmləndirdi.
Bu illər ərzində Azərbaycan gücləndi, Ordumuz yenidən təşkil edildi. Nəticədə 44 günlük Vətən müharibəsi Azərbaycan Ordusunun mütləq qələbəsi ilə yekunlaşdı. Azərbaycanın malik olduğu imkanların, birliyimizin, həmrəyliyimizin təqdimatı oldu. Torpaqlarımızın işğaldan azad edilməsi ilə ölkə rəhbəri ata vəsiyyətini yerinə yetirdi.
Yubiley tədbirində YAP rayon təşkilatının sədri Eldar Əsədov, Səhləbad ərazi partiya təşkilatının sədr müavini, Vətən müharibəsi iştirakçısı Səbuhi İbrahimov, Statistika İdarəsinin rəis müavini İradə Rəfiyeva, Tərtər Cümə Məscidinin imamı Sadiq Cəfərov çıxış edərək, YAP-ın Azərbaycanın siyasi həyatında əvəzsiz rolundan, partiyanın təkcə ölkəmizdə deyil, Qafqazda, hətta bütün dünyada yüksək nüfuza malik olduğunu söyləyiblər. YAP-ın sıralarının gündən-günə artmasının, sosial bazasının daha da möhkəmlənməsinin Ulu Öndər Heydər Əliyev ideyalarına etimadın və Prezident, Yeni Azərbaycan Partiyasının sədri İlham Əliyevin siyasətinə dəstəyin bariz nümunəsi olduğunu vurğulayıblar.
Tədbirin sonunda YAP Tərtər rayon təşkilatı tərəfindən YAP sıralarına yeni qəbul olunmuş bir qrup gəncə partiya vəsiqələri və rayonun ictimai - siyasi həyatında göstərdiyi xidmətlərə görə bir qrup partiya fəalına fəxri fərmanlar təqdim edilib.
Rayon rəhbəri 75 yaşlı şəhid anası Fizzə İsgəndərovanı ad günü ərəfəsində ziyarət edib
Tərtər Rayon İcra Hakimiyyətinin başçısı Müstəqim Məmmədov birinci Qarabağ müharibəsi şəhidi-İsgəndərov İlham İsgəndər oğlunun anası Fizzə xanımla onun ad günü ərəfəsində görüşüb, şəhid anasını 75 illik yubileyi münasibəti ilə təbrik edərək ona səmimi arzularını bildirib. İcra başçısı bütün şəhid analarının baş tacımız olduğunu, Vətənə layiqli, vətənpərvər oğullar böyütdükləri üçün onların da Vətən qədər əziz olduqlarınını vurğulayıb, anaya rayon icra hakimiyyəti tərəfindən təşəkkürnamə və gül dəstəsi təqdim edib, ailənin qayğıları ilə maraqlanıb.
Şəhid İskəndərov İlham İskəndər oğlu 1975-ci il sentyabr ayının 27-də Tərtər rayonunun Hüsənli kəndində anadan olub. Orta təhsilini həmin kənd orta məktəbində aldıqdan sonra M.Ə.Sabir adına sovxozda fəhlə işləməyə başlayıb. 1993-cü ilin oktyabr ayında rayon hərbi komissarlığı tərəfindən Milli Ordu sıralarına həqiqi hərbi xidmətə göndərilib. N saylı hərbi hissədə xidmət etməyə başlayıb. 1994-cü il yanvar ayının 10-da Füzuli rayonunun Yuxarı Əbdürrəhmanlı kəndi uğrunda gedən döyüşdə şəhid olub. Subay idi.
Fizzə İsgəndərova ona, bütün şəhid ailələrinə, qazilərə göstərilən diqqət və qayğıya görə Azərbaycan Respublikasının Prezidenti cənab İlham Əliyevə və Birinci vitse prezident Mehriban xanım Əliyevaya öz minnətdarlığını bildirib.
