“Pulu almağa gələndə məni tutdular”Bakıda 8 yaşlı uşağı girov götürən və özünü İŞİD-çi kimi təqdim edərək valideynlərindən azad olunması müqabilində pul tələb edən şəxs törətdiyi cinayətin detallarını açıqlayıb.
Hadisə Sabunçu rayonu ərazisində yerləşən Şuşa şəhərciyində baş verib.
Mayın 10-da Şuşa şəhərciyində yaşayan Elnur Ramazanlı 12-ci Polis Bölməsinə müraciət edərək mayın 9-da 8 yaşlı oğlu Hüseynin evdən çıxaraq geri qayıtmadığını bildirib.
Aparılmış araşdırmalarla özünü “İŞİD” üzvü kimi təqdim etmiş şəxsin E.Ramazanlının mobil telefonuna dəfələrlə zəng edib oğlu Hüseyni girov götürməsi, azad edilməsi müqabilində 30 000 manat pul istəməsi və polisə bu barədə məlumat veriləcəyi təqdirdə, onun orqanlarını çıxarıb satacağını deməsi müəyyən edilib.
Bakı şəhər Baş Polis İdarəsinin Cinayət Axtarışı İdarəsi və Sabunçu Rayon Polis İdarəsinin 12-ci Polis Bölməsi əməkdaşlarının həyata keçirdikləri əməliyyat-axtarış tədbirləri nəticəsində hadisəni törədən Abşeron rayon sakini Elnur Məmmədov tutulub, şəhərciyin ərazisində yerləşən 2 mərtəbəli tikintisi başa çatmamış tikilidə əlləri, ayaqları və gözləri yapışqanlı lentlə bağlı vəziyyətdə olan Hüseyn tapılaraq valideynlərinə təhvil verilib.
Elnur Məmmədov cinayəti necə törətdiyini belə təsvir edib:
“Bəzi saytlara baxmışdım İŞİD-lə bağlı. Qonşuluqda 9 yaşında bir oğlanı görüb “sən yaxşı futbol oynayırsan” adı ilə aldadıb yarımtikiliyə apardım. Sonra atasına zəng edib əvvəl 10 min, 2-3 günə isə 20 min manat verməsini istədim. Pulu almağa gələndə məni tutdular”.
Faktla əlaqədar cinayət işi başlanıb, araşdırma aparılır.
