Moskvada Azərbaycan və Rusiya xarici işlər nazirləri arasında görüş keçirilib. Sergey Lavrov Ceyhun Bayramov görüşündə ikitərəfli münasibətlər, beynəlxalq və regional gündəmin məsələlərini müzakirə ediblər. Lavrov bildirib ki, "Biz Azərbaycan, Ermənistan və Rusiya liderlərinin əldə etdiyi bütün razılaşmaların həyata keçirilməsi əzmindəyik".Bu da ondan xəbər verir ki, Rusiya Cənubi Qafqazda itirdiyi nüfuzunu Qarabağ çərçivəsində Azərbaycan-Ermənistan münasibətləri üzərindən yenidən geri qaytarmaq istəyir.. İstəyir, amma mümkünmü?
“Ağ Partiya” başqan müavini Əhəd Məmmədli Bizimyol.info xəbər portalına açıqlamasında bildirib ki, Rusiya Cənubi Qafqaz ölkələri ilə "mübarizə" aparmağa davam edir. Çünki son illərdə Rusiya regionda mövqelərini itirib.
Politoloqun fikrincə, İkinci Qarabağ müharibəsi, Ukranyada müharibə Rusiyanın nüfuzuna xələl gətirdi. Rusiyanın mövqelərinin itirilməsi ilə nəticələndi. Yəni daha əvvəlki kimi nə Cənubi Qafqaz nə Ukrayna Rusiyanın arxa baxçası deyil. İndi ruslar sadəcə qalan mövqelər uğrunda mübarizə aparırlar. Ruslar istəyir ki, Qarabağ məsələsi ilə bağlı razılaşmalar, müzakirələr, 8 noyabrda Rusiyanın iştirakı ilə imza atılan qərarlar üzərində davam etsin, hər hansı bir xarici ölkə bu məsələyə qarışmasın.
“Paşinyanın Moskvaya səfər edəndən sonra “Ukraynada Rusiya məğlubiyyəti Ermənistanın sonu deməkdir. Ermənistanın başına nələr gələcəyini təsəvvür etməyə belə qorxuram” deməsi sübut edir ki, Paşinyan da artıq Rusiya reysində getməyə razı olub. Əvvəl də Paşinyan Rusiya reysində idi. Amma o, bir neçə yerdə eyni zamanda oturmağa çalışırdı. İndi anlamağa başlayıb ki, bu arzu mümkünsüzdür. Bu səbəbdən də, Azərbaycanla münasibətlərdə, Qarabağ məsələsində, Zəngəzur məsələsində və Azərbaycanla mübahisəli digər ərazi məsələlərində Rusiyaya güvənməyi tərcih edir. Çünkü regionda ona dəstək ola biləcək yeganə hərbi gücün Rusiya olduğunu görür”-deyən politoloq qeyd edib ki, burada hərbi güc deyildikdə sülhməramlıları nəzərdə tutulur. Yəni burada Ermənistanın güvəndiyi digər ölkələrin hərbi gücü yoxdur.
Avropa Ermənistanla sərhədə müşahidəçi kontingenti gətirsə də, onlar da sərhəd boyunca son atışmalardan sonra ümumiyyətlə sərhədə yaxın gəlməkdən imtina etdilər. Paşinyan isə, bu məsələdə Rusiyanı öz tərəfinə razı salmağa müvəffəq olur.
“Paşinyan bu gün bir söz deyir, sabah başqa bir söz deyir. Yəni güvəniləsi siyasətçi deyil. Ona görə biz Paşinyanın dediklərini yox, siyasi reallıqlara söykənərək, hərəkət etməyə davam etməliyik. Bu il ərzində bu məsələni həll etməyi bacarmalıyıq. Rusiyanı geri çəkilməyə müvəffəq olub, qalan ərazilərimizi nəzarətə götürməyi bacarmalıyıq. Rusiya bunun əksini istəyir. Rusiya vəziyyətin dondurulmuş vəziyyətdə qalmasını istəyir. Bu isə, Azərbaycanın maraqlarına cavab vermir”,- deyə Əhəd Məmmədli əlavə edib. O, qeyd edib ki, Rusiya Ermənistana yenidən nəfəs almağa imkan verəcək. Bölgədəki terrorçuların, separatçıların daha çox silahlanmasına və güclənməsinə imkanlar yaradacaq. Bu isə, öz növbəsində yeni status-kvonun yaranmasına səbəb olacaq. Növbəti status-kvonun 30 il davam etməsi isə, Azərbaycanın maraqlarına cavab vermir .
