“Azərbaycan oyaqdır, sərvətinə dayaqdır!”, “Azərbaycan milləti, qoruyacaq sərvəti!”, “Ekoterrora son!”, “Ekocide”... Artıq üç aydır ki, qulağımız bu şüarları eşidir, həm də azad ərazilərdə - Laçın-Xankəndi yolunun Şuşadan keçən hissəsində. Hər kəs anladı ki, söhbət Laçın yolunda Azərbaycan fəallarının, vətəndaş cəmiyyəti nümayəndələrinin keçirdiyi etiraz aksiyalarından gedir.
Aksiyanın hansı səbəbdən başladığını, etirazçıların tələblərinin nə olduğunu deməyə ehtiyac yəqin ki, yoxdur. Şüarlardan da göründüyü kimi, etirazlar ekologiyaya erməni separatçılarının vurduğu ziyanadır. Aksiyaçılar tələbləri yerinə yetirilən anadək dinc etirazlarını davam etdirəcəklərini bildiriblər və israrlarında davamlıdırlar.
Bir də Laçın yolundakı aksiyaların qəhrəmanları var – etirazçılar. Hansı ki, demək olar ki, onlar gənclərdən ibarətdirlər. Gecə-gündüz, qara, çovğuna məhəl qoymadan Laçın yolunda ölkəmizin milli maraqları naminə ayaqda olan gənclik. 2020-ci ildə Vətən müharibəsində xalqımıza Böyük Zəfər qazandıran Azərbaycan gəncləri indi də suverenliyimizin tam bərqərar olması üçün dinc aksiyaları ilə mübarizələrini davam etdirirlər.
Cənab Prezident İlham Əliyevin hakimiyyəti dövründə yetişən gənclik Vətən müharibəsində hansı qəhrəmanlıq nümayiş etdirdisə, bu gün də missiyasını qəhrəmanlıqla davam etdirməkdədir. Belə gəncliklə bütün xalqımızın fəxr etməsi labüddür. Hansı ki, Ali Baş Komandanımız, Prezident İlham Əliyev də o gəncliklə fəxr etdiyini dəfələrlə çıxışlarında bildirib.
"İlk növbədə o gənclərə eşq olsun demək istəyirəm, onlar bizim fəxrimizdir. Gecə-gündüz şaxtalı-qarlı havada oradadırlar, öz haqlarını tələb edirlər və bir daha Azərbaycan gəncinin nə qədər yüksək keyfiyyətlərə malik olmasını bütün dünyaya göstərirlər", demişdi ölkə başçısı azərbaycanlı ekofəalların Laçın yolunda keçirdiyi dinc aksiyadan danışarkən. Prezident bununla söyləmiş oldu ki, O, hakimiyyəti dövründə yetişmiş Azərbaycan gəncliyinə güvənir, onlarla fəxr edir. Əlbəttə ki, yetişməkdə olan nəsil bu diqqətdən stimul, güc alaraq apardığı haqq mübarizəsində öz əzmini, iradəsini nümayiş etdirir.
Əksəriyyəti gənclərdən ibarət olan ekofəalların aksiyası bu gün də yüksək əhval-ruhiyyədə davam etdirilir. Tələblər yerinə yetirilənədək də etirazlar davam edəcək. Lakin təəssüflər olsun ki, cəmiyyətimizdə buna bəzən ağız büzənlər də tapılır. Gənclərin bu mübarizəsinə bəzən rişxəndlə yanaşanla olur, aksiyanın Azərbaycan üçün faydasız olduğunu iddia edənlər tapılır. Bəziləri bildirirlər ki, bu üsul tələblərin yerinə yetirilməsi baxımından nəticəsizdir. Hərçənd ki, bunu iddia edənlər bir dəfə də olsun Azərbaycanın milli maraqları naminə yerlərindən bir addım da tərpənmirlər. Belə şəxslər qarda, şaxtada gecə-gündüz haqlı tələbimizi bütün dünyaya duyuran gəncliyə söz demək haqqını özlərində necə tapırlar, maraqlıdır.
Qaldı ki, gəncliyin mübarizəsinin nəticəsiz olacağını düşünmək, bu, əlbəttə, kökündən yanlışdır. Birincisi və ən önəmlisi odur ki, bu aksiya başladığı gündən bu yanadır ki, Qarabağımıza erməni separatçıları qeyri-qanuni yükləri daşıya bilmirlər, terrorçular silahlanmalarında məhdudiyyət yaşayırlar. İkincisi, bütün dünya bir daha gördü ki, Azərbaycan insanı öz haqlarının, hüquqlarının tələbində israrlıdır, ərazilərinin talan edilməsinə əsla imkan verməyəcək. Üçüncüsü isə odur ki, bu aksiya ilə Azərbaycan bir çox siyasi dvidentlər əldə etmiş oldu, hansı ki, Azərbaycanın ərazi bütövlüyünün tamamilə təmin olunmasında bu dvidentlər son dərəcə vacibli elementlərdir.
Gəncliyin mübarizəsinin artıq nəticə verdiyini indidən proqnozlaşdırmaq olar: daha üç ay da keçsə, daha altı ay da keçsə, tələblər yerinə yetiriləcək, ərazilərimizdə ekoloji terrora son qoyulacaq, Qarabağa qanunsuz yüklərin daşınmasının qarşısı alınacaq. Bunun necə baş verəcəyi də çox sadədir: labüd olan baş verəcək – Azərbaycan sərhədlərində nəzarət-buraxılış məntəqələri, gömrük postları qoyulacaq. Bununla da ötən ilin dekabrının 12-də Azərbaycan ictimaiyyətinin başlatdığı, hazırda gənc fəalların davam etdirdiyi dinc mübarizəsi müsbət nəticə ilə yekunlaşacaq. Əlbəttə, mübarizənin qələbə ilə nəticələnəcəyi gün uzaqda deyil...
Nihat Qorqud Əliyev
