“Paşinyanı qətlə yetirə bilərlər, buna görə də onun mühafizəsi gücləndirilib”Rusiya Xarici İşlər Nazirliyi (XİN) İrəvandakı “Surmalu” ticarət mərkəzində baş verən partlayışda Rusiya strukturlarının əli olması ilə bağlı ittihamlardan sonra Ermənistan XİN-ə nota göndərib. Rusiyanın Ermənistandakı səfirliyinin bununla bağlı açıqlamasında bildirilir ki, İrəvandakı ticarət mərkəzində baş vermiş faciədə Rusiya strukturlarının əli olması ilə bağlı ittihamlardan dərin hiddət keçirirlər.
“Biz bunu Rusiya-Ermənistan müttəfiqlik münasibətlərinə xələl gətirmək məqsədi daşıyan siyasi qüvvələrin birbaşa təxribatı kimi qiymətləndiririk. Ermənistan hakimiyyətindən bu cür qeyri-dost təzahürlərin qarşısını almağa yönəlmiş addımlar, o cümlədən lazımi ictimai açıqlamalar gözləyirik”, - deyə səfirlikdən vurğulanıb.
Qeyd edək ki, Ermənistan mətbuatında baş verən partlayışın Rusiya tərəfindən təşkil edildiyi ilə bağlı iddialar yayılıb. Məlumatlara görə, Rusiya bu təxribatı hazırlamaqla Ermənistanın daxilində siyasi sabitliyi pozmağa və vətəndaşları hakimiyyətdən narazı salmağa çalışır.
Putin administrasiyasının Ermənistan iqtidarı ilə münasibətlərinin normal olmadığı, Paşinyan hökumətinin Qərbə yaxınlığı səbəbindən uzun müddətdir Rusiya tərəfindən təzyiqlərə məruz qaldığı, hətta bir neçə dəfə onun hakimiyyətdən devrilməsi üçün cəhdlər göstərildiyi heç kimə sirr deyil. Bir çox ekspertlər baş verənləri Kremlin İrəvana növbəti təzyiq aləti kimi qiymətləndirirlər. Onların qənaətinə görə, Moskva Paşinyanı devirib öz adamını hakimiyyətə gətirməklə Ermənistana nəzarəti tam şəkildə əlinə almaq niyyətindədir. Azərbaycan Milli Məclisinin üzvü Vahid Əhmədov AYNA-ya açıqlamasında deyib ki, Rusiyanın Azərbaycana və Ermənistana təzyiqləri davam etməkdədir: “Çünki Rusiya fərqindədir ki, artıq postsovet məkanını itirir. Ukraynada baş verənlər, Moldova, Gürcüstan və digər nümunələr başqa keçmiş ittifaq dövlətlərinin də Rusiyaya olan bütün bağlarını qoparır. Artıq keçmiş sovetlər məkanında Rusiyaya qarşı dərin qəzəb hökm sürməkdədir və hamı Moskvadan qopmağa çalışır”.
“Şimal qonşumuz da dinc oturmayıb və müəyyən təzyiq alətləri ilə nəzarəti öz əlində saxlamağa çalışır. Bu məqsədlə müxtəlif təxribatlar törədir, münaqişələr yaradır, qonşu dövlətləri üz-üzə qoymağa çalışır. Tamamilə mümkündür ki, İrəvanda baş verənlərdə Rusiyanın da hər hansı formada iştirakı olsun. Lakin bu, sadəcə bir ehtimaldır və yekun sözü Ermənistanın hüquq-mühafizə orqanları deməlidir”, - deyə həmsöhbətimiz bildirib.
Deputatın sözlərinə görə, Paşinyanın Qarabağla bağlı mövqeyi Rusiyanı qane etmir: “Məlumdur ki, Paşinyan demokratik yolla iqtidara yiyələnib. 44 günlük müharibədə sonra məğlub olmasına rəğmən, Ermənistan cəmiyyəti tərəfindən yenidən dəstək qazanıb. Çünki Ermənistan ictimaiyyəti sülhdən yanadır və Rusiyanın forpostu olmaqdan yorulub. Həm revanşist qüvvələrə münasibətinə, həm də Qarabağ məsələsində tutduğu loyal mövqeyə görə fəaliyyəti Ermənistan cəmiyyəti tərəfindən rəğbətlə qarşılanır. Qərbə yaxınlığı və qeyd etdiyim səbəblər Rusiyanı qıcıqlandırır”.
“Bu mənada hər vəchlə ona təzyiq göstərməyə çalışırlar. Düşünürəm ki, Azərbaycan və Türkiyə ilə münasibətləri bərpa edərək, Ermənistan Rusiyanın bu təzyiqlərindən yayına biləcək. Əslində Ermənistan üçün ən doğru seçim də elə budur”, - deyə Əhmədov vurğulayıb. Dia.az-ın məlumatına görə, politoloq Zərdüşt Əlizadə isə AYNA-ya şərhində söyləyib ki, İrəvanda baş verən partlayışın təbii, yoxsa terror hadisəsi olması barədə qəti mülahizə yürütmək çətindir: “Çünki dünyanın müxtəlif yerlərində bu cür partlayışlar baş verir. Ermənistanda da bunun baş verməsi gözləniləndir. Burada kənar dövlətləri ittiham etmək, səbəbi xaricdə axtarmaq Ermənistan siyasi dairələri üçün xarakterikdir”.
“Lakin istisna da deyil ki, Rusiyanın da bu partlayışda əli olsun. Bu, elə bir məsələdir ki, araşdırmalardan sonra hüquqi müstəvidə aydınlıq gətirilməlidir. Ermənistan cəmiyyəti elə bir cəmiyyətdir ki, orada bu kimi olaylardan hər zaman siyasi məqsədlər üçün istifadə olunub. Digər yandan siyasi məqsədlər üçün terrordan istifadə bu ölkədə geniş yayılıb. Yaxın tarixdə siyasi məqsədlər üçün törədilən terror aktlarını da az görməmişik. Götürək elə Ermənistan parlamentində deputatların güllələnməsini. Orada buna bənzər hallar çox baş verib”, - deyə analitik qeyd edib.
Onun sözlərinə görə, Rusiya Ermənistana daim təzyiq göstərməyə çalışıb: “Təkcə Ermənistana deyil, digər postsovet ölkələrinə də. Elə Azərbaycana da. İmperialist maraqları naminə şimal qonşumuz hər zaman keçmiş ittifaq ölkələrini qarışdırıb, münaqişələr yaradıb. Qarabağ münaqişəsindən də təzyiq vasitəsi olaraq istifadə edib. Lakin bir məsələ var ki, artıq revanşist qüvvələrin Ermənistana təsir imkanları yoxdur. Köçəryan, Sərkisyan kimi siyasətçilər daxildə dayaqlarını tam şəkildə itiriblər. Paşinyan isə demokratik yolla iqtidara gəlib. Qərbə həm birbaşa, həm də mənəvi bağlılığı mövcuddur”.
“Bunu isə Moskvada həzm etmirlər. Bir neçə dəfə onu devirməyə səy göstərsələr də, buna nail olmayıblar. Bu dəfə də belə bir cəhd olacaqsa, nəticəsiz qalacaq. Həm də artıq Rusiya əvvəlki Rusiya deyil, xeyli zəifləyib. Paşinyan Qarabağ məsələsində ədalətli mövqe tutarsa, Ermənistan cəmiyyətindən tam dəstək alacaq və onu devirmək mümkün olmayacaq”, - deyə müsahibimiz diqqətə çatdırıb.
Əlizadə hesab edir ki, Paşinyanı qətlə yetirə də bilərlər: “Siyasi yollarla susdura bilmədiklərini fiziki üsullarla aradan götürmək Rusiyanın köhnə adətidir. Təbii ki, onlar Paşinyanı öldürmək istəyəcəklər. Bunu Ermənistan iqtidarında da bilirlər. Elə buna görə də onun mühafizəsi gücləndirilib. Bu məqsədlə xeyli peşəkar əməliyyatçılar cəlb edilib”.
