“Bütün dünyaya göstərdik ki, Türkiyə- Azərbaycan birliyi sarsılmazdır və ağır günlərdə biz bir-birimizin yanındayıq” (Azərbaycan Respublikasının Prezidenti İlham Əliyev).

“Hər zaman olduğu kimi, bu gün də Azərbaycanın yanındayıq” (Türkiyə Cümhuriyyətinin Prezidenti Rəcəb Təyyub Ərdoğan).

İki dövlət arasındakı münasibətləri ölkə prezidentləri qısaca belə ifadə etmişlər.

Azərbaycan- Türkiyə qardaşlığı sarsılmazdır və böyük geosiyasi və geoiqtisadi potensiala malik olan bu iki ölkənin strateji əməkdaşlığı regiondaq sülhün və təhlükəsizliyin təmin edilməsinə, habelə bölgədə iqtisadi inkişafın daha da gücləndirilməsinə yönəlmişdir. 2020- ci il, dekabrın 10-da Azadlıq meydanında keçirilən Azərbaycanın 44 günlük İkinci Qarabağ müharibəsinin zəfər paradında Prezident İlham Əliyev və Türkiyə Prezidenti Rəcəb Təyyub Ərdoğanın birlikdə olması bu qardaşlıq birliyinin ən böyük təcəssümüdür. Türkiyənin Azərbaycana verdiyi siyasi və mənəvi dəstək hər bir Azərbaycan vətəndaşını qürurlandırır və sevindirir.

Türkiyə dünya miqyasında Azərbaycana ən böyük dəstək verən ölkədir. Eyni zamanda, Azərbaycan xalqı və Azərbaycan dövləti də Türkiyə dövlətinin və xalqının yanındadır.

Yüksək səviyyəli əməkdaşlıq əsasında qurulan Azərbaycan – Türkiyə münasibətləri daim güclənir. Eyni soykökünə, dilə, dinə, mədəniyyətə və bir çox qarşılıqlı bağlara malik olması Azərbaycan və Türkiyə xalqları arasında əlaqələrin daim inkişaf etməsinə şərait yaradır. Ümumilli lider Heydər Əliyevin “Bir millət, iki dövlət” olaraq xarakterizə etdiyi Azərbaycan –Türkiyə dövlətləri arasındakı münasibətlər hər iki ölkə rəhbərliyinin həyata keçirdiyi siyasət nəticəsində dayanmadan inkişaf edir, iki xalq arasında əlaqələrin səviyyəsini keyfiyyətcə yeni mərhələyə keçirir. Bu gün Azərbaycan və Türkiyəni bir-birinə bağlayan strateji layihələr fəaliyyət göstərir. Bakı- Tbilisi- Ceyhan neft, Bakı – Tbilisi – Ərzurum qaz kəmərləri və Bakı-Tbilisi- Qars dəmiryolununreallığa çevrilməsi hazırda bu iki qardaş xalq arasındakı əlaqələrin möhkəmliyini daha da artırmaqdadır.

Ən əsası, Azərbaycan –Türkiyə əlaqələri bütün türk dünyası üçün də mühüm rol oynayır və türkdilli dövlətlər arasında münasibətlərin inkişafına da güclü təsir göstərir.

Azərbaycan və Türkiyənin mövcud potensialı iqtisadi sahədə əlaqələrin, xüsusən də qarşılıqlı ticarət dövriyyəsinin həcminin xeyli dərəcədə artırılmasına imkan verir.

Bir sözlə, bütün dünyaya nümunə olan və daim güclənən Azərbaycan və Türkiyə münasibətləri dayanmadan inkişaf edir, əməkdaşlığın yüksək səviyyəsi hərtərəfli əlaqələrin gücündən və sarsılmazlığından xəbər verir.

Ölkələrimiz arasında yeni sazişlər imzalanması isə böyük bir coğrafi məkanda reallaşdırılan enerji siyasətinin əsas konturlarını müəyyən edən mühüm faktorlardan biri olacaq. Çünki Avropa İttifaqının, digər Qərb ölkələrinin böyük ümidlərlə baxdığı “Nabukko” kəmərinin inşa edilməsi xeyli dərəcədə məhz Azərbaycanla Türkiyə arasında razılaşdırılan yeni qaz sazişindən xəbər verir. Bütün bunlar isə ölkəmizin energetika sahəsində möhkəmlənən əlaqələrinin qlobal enerji təhlükəsizliyinin təminatına da yeni mühüm töhfələr bəxş edəcəyinə böyük inam yaradır.

“Azərbaycanın kədəri- kədərimiz, sevinci-sevincimizdir”, -deyən Atatürkün Azərbaycana münasibəti bu gün inkişaf edərək ən yüksək həddə çatmışdır.

Zəfər paradında Rəcəb Təyyub Ərdoğanın çıxışındakı sözlər Azərbaycanla Türkiyənin əbədi və ayrılmaz qardaşlıqlarının bariz nümunəsidir.

“Qarabağı 30 illik həsrətdən sonra Ana vətəni ilə qovuşduran Azərbaycan ordusunun şəxsi heyətini təbrik edir, onları dualarla cəbhəyə göndərən anaların əllərindən öpürəm”.

Bu kəlmələri yalnız qardaş qardaşa deyə bilər. Var olsun Azərbaycan – Türkiyə qardaşlığı!

Bakıxanov qəsəbəsi, N. İsmayılov adına 80 nömrəli məktəbin

Azərbaycan dili və ədəbiyyat müəllimi Rasimə Abbasova