“Neftçi”nin yeni futbolçusu Donald Gerye Premyer Liqanın 4-cü turunda “Qarabağ”a 0:2 hesabı ilə məğlub olduqları matçdan sonra jurnalistlərin suallarını cavablandırıb.

“Qafqazinfo” xəbər verir ki, Bakı klubunda debüt edən haitili keçmiş komandasına qarşı oynamağın çətinliyindən danışıb.

– Bu gün heç-heçə edə bilərdik. Qol epizodlarımız çox oldu. “Qarabağ” yaxşı komandadır. Məğlub olduq. Yəqin ki, hesab da oyuna görə idi. Növbəti matçlarda daha yaxşı çıxış etməyə çalışacağıq.

– Hiss olunurdu ki, qol vurmaq istəyirsiniz. Hətta 2 zərbəniz dirəkdən qayıtdı. Bu qarşılaşmaya özünüzü “Qarabağa” sübut etmək üçün çıxmışdınız?

– “Qarabağ” da məni tanıyırlar. Özümü kiməsə sübut etmək fikrim yoxdu. Sadəcə, öz oyunumu oynayıb, komandama faydalı olmağa çalışırdım.

– Belə bir məsələ vardı ki, daha çox pul tələb etdiyinizə və klub bununla razılaşmadığına görə “Qarabağ”ı tərk etmisiniz. Haiti mətbuatında hələ də “Qarabağ”a qarşı kin saxladığınız barədə yazılar var idi. Bunlar doğrudurmu?

– Hər şey mənim elektron poçtumda var. Danışmışdıq ki, yeni müqavilə imzalayıram. Onlar iyulun 5-dək maaşın yarısını ödəməli idilər. Həmin vaxt hesabıma köçürmə olmadığını gördüm. Dedilər ki, gəl, bir matçda oyna, maaşının yarısını ödəyəcəyik. Bu, mənə sərf etmirdi. Əgər istəyirlərsə, hər şeyi sübut edə bilərəm.

– Maraqlıdı, nəyə görə məhz “Neftçi”yə keçdiniz? Başqa təkliflər var idi?

– Fransa və Türkiyədə oynamaq variantım oldu. Amma mən “Neftçi”ni seçdim. Onların işə yanaşması daha çox xoşuma gəldi.

– Soni Nordi “Zirə”yə transfer olunduqdan sonra “ora sənin yerin deyil” deyə açıqlama vermişdiniz. “Zirə”ni, yoxsa Azərbaycan Premyer Liqasını nəzərdə tuturdunuz?

– Nordi çox yaxın dostumdu. Biz Haiti millisinin U-17, U-19 yığmalarında birgə çıxış etmişik. Hər gün danışırıq. O, bura gəlmədən öncə mənə yazırdı, soruşurdu. Mən də ona buradakı ən yaxşı klubların “Qarabağ”la “Neftçi” olduğunu bildirdim. Özü Azərbaycanda “Neftçi”, “Zirə” və adı yadımda olmayan daha bir klubdan təklif aldığını demişdi. Mən isə “Belə imkanın varsa, “Neftçi”ni seç” cavabını vermişdim. Mən o sözlə demişdim ki, “Neftçi” variantın varsa, “Zirə” sənin səviyyən deyil. Amma futbol ictimaiyyəti bunu pis qarşıladı. Mən Azərbaycan çempionatını necə aşağılaya bilərəm ki, özüm burada oynayıram. Norde yüksək səviyyəli oyunçudu. Bunu nəzərə alaraq, onun paylaşımına elə bir şərh yazmışdım. Heç kimə heç nəyi sübut etmək istəmirəm. Öz ürəyim var, mən sizə, siz isə mənə hörmətlə yanaşırsınız.

– Düşünmürsünüzmü ki, “Qarabağ”la müqayisədə “Neftçi”də çempion olmaq çətin görünür?

– Futbolda mümkünsüz bir şey yoxdu. Düzdü, hazırda xal fərqimiz çoxdu. Amma çempionatın çox hissəsi irəlidədi. Döyüşsək və daha çox çalışıb-işləsək, hər şey real ola bilər. Özünüz də inanmasaydınız, jurnalist olmayacaqdınız. Sizin kimi biz də istəyimizə çatmaq istəyirik.