Yol-nəqliyyat hadisəsi nəticəsində növbəti daha bir süpürgəçi qadın dünyasını dəyişib. Hadisə Sumqayıt şəhəri ərazisində baş verib.

Bu barədə Sputnik Azərbaycan-a Sumqayıtın hüquq-mühafizə orqanlarından məlumat verilib.

Bildirilib ki, insident dekabrın 21-də şəhərin Heydər Əliyev prospektində yaşanıb.

Milli.Az sputnikə istinadən xəbər verir ki, “VAZ-2104” markalı avtomobil küçədən keçən piyadanı – 54 yaşlı Bayramova Xeyransa Seyran qızını vurub. Qadının aldığı travma ölümcül olub və o, hadisə yerindəcə dünyasını dəyişib.

Daha sonra məlum olub ki, Bayramova Sumqayıt şəhər Mənzil Kommunal Təsərrüfat Departamentinin işçisidir. Faktla bağlı araşdırma aparılır.

Qeyd edək ki, X. Bayramova cari il ərzində Bakı və Abşeron ərazisində xidməti vəzifəsini yerinə yetirərkən həlak olan 12-ci süpürgəçidir. Bundan əvvəlki ölüm halı dekabrın 13-də “Koroğlu” metro stansiyası yaxınlığında qeydə alınıb.

Həmin vaxt 173 saylı “Daewoo” markalı avtobus 58 yaşlı süpürgəçi Əliyeva Hürü Cəlal qızını vurmuşdu. Qadını təcili 3 saylı kliniki tibbi mərkəzə aparsalar da, həkimlərin bütün cəhdlərinə baxmayaraq, onun həyatını xilas etmək mümkün olmamışdı.