Hər bir şəxs özünün keçdiyi həyat yoluna nəzər salanda, unudulmaz və xoş xatirələrə dönmüş anlarını, günlərini xəyalından keçirəndə istər-istəməz kimlərlə ünsiyyət saxladığı, kimlərlə yoldaşlıq və dostluq etdiyi insanlar göz önünə gəlir. Elə insanlar var ki, onların həyatı, fəaliyyəti elinə, xalqına, vətəninə xidmətə həsr olunur. Müdriklər demişkən, "xalq üçün, vətən üçün yaşanan ömür əsl insan ömrüdür". Belə insanların ömrü çətin, mənalı və şərəfli olur, başı həmişə el içində uca olur. Onlar öz xoşbəxtliyini, səadətini, varlığını vətənə, xalqa ləyaqətlə xidmətdə görür. Belə insanlar öz xalqının, millətinin mənəvi siması, genefondudur desək səhv etmərik. Tam məsuliyyət və qürurla deyə bilərik ki, belə insanlardan biri də sözün həqiqi mənasında, gözəl insan, Mir Mövsüm Ağa ziyarətgahının sədri Hacı Nizam Həbiboğludur.

Mir Mövsüm Ağa ziyarətgahının sədri Hacı Nizam Həbiboğlunun adı, respublika ictimaiyyətinə bəlli bir addır. Xoşbəxt o şəxsdir ki, onu geniş ictimai auditoriya daşıdığı vəzifəsinin öhdəsindən layiqincə gəlmək bacarığına, xeyirxah əməllərinə, ziyalılığına, yaradıcılıq qabiliyyətinin göstəricilərinə və.s-yə görə tanıyıb hüsnü-rəğbət bəsləyirlər..










Mir Mövsüm Ağa ziyarətgahının sədri Hacı Nizam Həbiboğlu - Xalq arasında Ətağa adı ilə tanınan Ağa Seyidəli Mir Abutalıb oğlu Mirmövsümzadə 1950-ci ildə dünyasını dəyişib və gördüyünüz bu məkanda torpağa tapşırılıb. Ağa hələ sağlığında əfsanəvi bir nüfuza, insanlar arasında dərih hörmət və ehtirama malik olub. Ağamız bu gün də İçəri Şəhərdə ziyarətgah olan evində hər zaman insanlar tərəfindən ziyarət olunub. O, insanlara təskinlik, inam, mənəvi qüvvə təlqin edən, cəfadan qurtarıb şəfa verən, səfa gətirən fitri istedad, ecazkar qabiliyyət sahibi kimi böyük nüfuz qazanmış, şöhrəti Azərbaycanın hüdudlarını aşıb uzaqlara yayılmışdı. İndinin özündə respublikamızda, Bakıda vaxtilə seyidi görmək nəsib olmuş, ona pənah gətirmiş, xeyir-duasını almış, onun şəfaverici əllərinin təmasını duymuş çoxsaylı şahidlər yaşayırlar. Minlərlə insan onun kəraməti sayəsində əlacsız sayılan azar-bezardan qurtulmuş, yüzlərlə sonsuz qadın nicat tapıb analıq səadətinə qovuşub. Camaat ona pənah gətirər, onun ilahi vegisinə inam bəsləyərdi. Cahan müharibəsi illərində oğulları, ərləri ölüm-dirim vuruşu aparan analar, gəlinlər Ağanın ocağına üz tutur, əzizlərinin cəbhədən sağ-salamat qayıtması üçün ondan xeyir-dua diləyirdilər.

Ağa dünyasını dəyişəndə minlərlə, on minlərlə insan yas tutdular, onun ruhuna rəhmət oxudular. Bu günədək seyidin son mənzilini, ömrünün əksər hissəsini keçirdiyi İçərişəhərdəki ocağını ziyarət edən xalqın axını kəsilmir.

İnsanlar əvvəlki kimi onun müqəddəs ruhuna inam bəsləyir, səcdə qılır, türbəsinə, odasına, bu gördüyünüz ziyarətgaha qədəm qoyaraq, nəzir verir, öz dərdi-sərinə əlac tapılmasına ümid bəsləyir, onun mübarək ruhuna pənah gətirirlər.

Ağanın məzarı 1950-92-ci illərdə baxımsız qalıb. Bizim də vətəndaşı olduğumuz Sovet hökuməti imkan verməyib ki, insanlar onun qəbri üzərində abadlıq işi görsünlər. Yaxşı yadımdadır, 90-cı illərin əvvəllərində İranın Məşhəd şəhərində İmam Rzanın məqbərəsini ziyarət etməyə getmişdim. O zaman ilk olaraq düşündüm ki, görəsən, bizdə niyə belə ziyarətgahlar yoxdur? İrandan qayıdan kimi Ağanın ailəsinin icazəsi ilə qəbir üstündə tikinti işlərinə başladım. Hörmətli Hacı Şərif və Tahir Quliyev də bu işdə mənə çox kömək oldular. Mən yeddi il ziyarətgahın tikilməsində fəhlə kimi işlədim. İki ildən sonra fədakar adamların səyi ilə, nəzir gətirən zəvvarların vəsaiti hesabına bu gördüyünüz əzəmətli abidə yarandı. Biz qarşıya belə bir məqsəd qoyduq ki tikintilər, memarlıq ünsürləri, ifrat təmtəraqdan uzaq, sadə, gözəl və əzəmətli, Ağa Seyid Əlinin xatirəsinə layiq olmalıdır. Və çox şükür ki, buna nail olduq. 1995- ci ildə Novruz bayramı ərəfəsində Seyidin türbəsinin açılış mərasimi oldu və o gündən bu məkan müqəddəs bir ocaq kimi insanların daha rahat istifadəsinə verildi.

Ağa Seyid Əli haqqında çoxlu əfsanələr, şahidlərin xatirələri var. Bu xatirələri danışanlar təkcə müsəlmanlar deyil, hələ o zamandan beynəlmiləl şəhər olan Bakının müxtəlif dinlərə və millətlərə məxusus olan vətəndaşları da var. Bu məkan Seyidin ruhuna ehtiramın və hörmətin izhar edildiyi bir ocağa çevrildiyindən və Seyidin hikmətlərini görənlərin sayı-hesabı olmadığından onun hikmətinə toplanan insanlar da təkcə ölkəmizdən deyil, xaricdən də gəlirlər.

Amma mən sizə bir məqamı da deyim, Seyidin yaşadığı o müqəddəs məkana ulu öndərimiz Heydər Əliyevin öz anası ilə ziyarətə gəldiyi də bizlərə məlumdur. Bunu Heydər Əliyev Seyidlə bağlı xatirələrində dilə gətirib. Bu ziyarətgaha möhtərəm Prezidentimiz İlham Əliyev və xanımı, mərhəmətli xeyriyyəçi insan Mehriban xanım da dəfələrlə gəlib ziyarətlərini ediblər. Ziyarətgahımızın ən dəyərli nəzirini də bu ocağa Mehriban xanım bağışlayıb. Ağanın rəsminin əks olunduğu möhtəşəm xalça ziyarətgahın bəzəyi, Ağanın ruhuna ehtiramın ifadəsidir.

Sizə deyim ki, bu şəfalı və Allahın böyük inayət etdiyi qəbri hətta Pyer Rişar və Jan Klod Van Dam kimi dünya ulduzları da ziyarət edib.

Bu ziyarətgahda bir xeyir iş, xeyir əməl olursa, bunların hamısı Allahın lütfü, Ağamızın mübarək ruhu və insanlarımızın, camaatın nəzir-niyazı hesabına olur. Biz bu nəzir-niyazdan hər bir xeyir iş üçün sərf edirik. Hörmətli akademikimiz, Dövlət müşaviri Kamal Abdullayev vasitəsilə Zaqatala rayonunun Əliabad kəndində ingiloyların ibadər etdiyi tarixi bir məscidin qəzalı vəziyyətdə olduğundan xəbər tutdum. Ziyarətgahın bu məscidin təmirinə yardımçı ola biləcəyini Kamal müəllimin diqqətinə çatdırdım və hörmətli Kamal müəllim də buna çox sevindiyini bildirdi. O məsciddə ibadət edən insanlar bizim din qardaşımızdır və hamımızın vətəni olan Azərbaycanın vətəndaşlarıdır, soydaşlarımızdır. Biz ziyarətgahda toplanan nəzir-niyazın hesabına o məscidin təmirinə maddi yardım göstərdik. Kamal müəllimin, Zaqatala rayon icra başçısı Mübariz müəllimin və məscid əhlinin iştirakı ilə elə həmin qəzalı vəziyyətdə olan məscidin həyətində toplandıq. Biz Mir Mövsüm Ağa ziyarətgahı olaraq maddi dəstəyimizi, ziyarətgaha bağışlanan xalçanı və ziyarətgahımızın çap etdirdiyi müqəddəs Quran kitablarını onlara hədiyyə etdik. İnsanların, kənd ağsaqqallarının, ziyalıların bu yardımlaşma üçün Ağanın ruhuna oxuduğu rəhmət bizlərin ən gözəl mükafatımız oldu.

Biz bu gün olduğu kimi sabah da, birigün də və ümumən Allahın bizləri yaşatdığı hər gələn gündə də yenə öz missiyamızı ləyaqətlə icra edəcəyik və Ağanın ruhuna xatir bu ocağa pənah gətirən insanlara hər zaman yardımçı olacayıq. Bunlardan əlavə biz təkcə müsəlman qardaşlarımıza deyil, bütün dinlərdən olan və bu ocağa pənah gətirən insanlara əl tutmaqda davam edəcəyik. Bunu da diqqətinizə çatdırım ki, ziyarətgahımız təzəlikcə Qax rayonunda bir neçə imkansız xristian gürcü ailəsini də himayəsinə götürmüş və onlara da mütəmadi yardımlar edəcəyik.

Tez bir zamanda ziyarətgahımızda pulsuz qan bankı da yaradılacaq, bununla bağlı artıq bir xeyli işlər görülmüşdür. Bizim niyyətimiz Ağanın ruhuna xatir toplanan ianələri, camaatımızın nəzir-niyazını yenə də insanlarımıza, ehtiyacı olanlara qaytarmaqdır. Bu işlərdə bizə yardımçı olan hər kəsi Uca Allah öz pənahında saxlasın.