Qardaş Türkiyənin Ankara şəhərində yerləşən Türk Dünyası Araşdırmaları Beynəlxalq Elmlər Akademiyasının 20 dekabr 2023-cü il tarixli qərarı ilə AMEA Rəyasət Heyəti aparatının şöbə müdiri texnika elmləri doktoru, professor Elton Məmmədov həmin Akademiyanın “Avropa Şərəf Ordeni” ilə təltif olunub. Orden Azərbaycan aliminə Türk dünyası elminə və təhsilinə xüsusi xidmətlərinə görə verilib.

Professor, həmçinin 2023-cü ildəki elmi nailiyyətlərinə görə Türk Dünyası Araşdırmaları Beynəlxalq Elmlər Akademiyasının “Türk dünyasında ilin ziyalısı” beynəlxalq mükafatına layiq görülüb.

Türk Dünyası Araşdırmaları Beynəlxalq Elmlər Akademiyasının “Avropa Şərəf Ordeni” və “Türk dünyasında ilin ziyalısı” mükafatı Akademiyanın başqanı professor-doktor Hasan Ahmet və Baş katib professor-doktor Tuncay Paltanın imzaladığı sertifikatlarla birgə professor Elton Məmmədova elmi qurumun rəsmi əlaqələndiricisi texnika elmləri doktoru, professor Elçin İsgəndərzadə tərəfindən təqdim edilib.

Təqdimatın sonunda çıxış edən texnika elmləri doktoru, professor Elton Məmmədov qardaş ölkənin mükafatlarını ümumilikdə Azərbaycan elminə verilən yüksək qiymət kimi dəyərləndirib.