Daxili İşlər Nazirliyi (DİN) Goranboyda evə silahlı basqınla bağlı məlumat yayıb.

DİN-in Mətbuat Xidmətinin Gəncə regional qrupunun baş inspektoru polis kapitanı Eşqin Qasımov bildirib ki, Xocalı Rayon Polis Şöbəsinə Goranboy rayon Börü Qəsəbəsində 1 nəfərin odlu silahdan atəş açması barədə məlumat daxil olub.

“Dərhal polis əməkdaşları hadisə yerinə gələrək müvafiq tədbirlər həyata keçirib və silahlı şəxs tərk-silah edilib. İlkin araşdırmalar zamanı məlum olub ki, 1962-ci il təvəllüdlü Mətləb Məmmədov, onun övladları 1993-cü il təvəllüdlü Surət Məmmədov, 1998-ci il təvəllüdlü, əvvəllər məhkum olunmuş Samir Məmmədov və Mətləb Məmmədovun həyat yoldaşı 1966-cı il təvəllüdlü Ş. Əliyeva 2006-cı il təvəllüdlü A. Yunislinin evinə gələrək orada sonuncu və ailə üzvləri ilə münaqişə edib, Surət Məmmədov avtomobildə olan ov tüfəngindən havaya atəş açıb. Hadisə nəticəsində odlu silahdan deyil əlbəyaxa münaqişə nəticəsində bir neçə nəfər xəstəxanaya müraciət edib, vəziyyətləri normaldır. Mətləb Məmmədov, Surət Məmmədov və Samir Məmmədov saxlanılıb”, - o deyib.

Faktla bağlı Xocalı Rayon Polis Şöbəsində Cinayət Məcəlləsinin müvafiq maddəsi ilə cinayət işi başlanıb araşdırmalar davam etdirilir.

***

Goranboyda iki ailə arasında dava olub, yaralananlar var.

Hadisə ötən gün qeydə alınıb.

Belə ki, aprelin 6-da Goranboy rayonunun Börü qəsəbəsi ərazisində yerləşən otlaq sahəsində 1993-cü il təvəllüdlü Surət Məmmədov qardaşı Samir, anası Şəfiqə Əliyeva və atası Mətləb Məmmədovla birlikdə Asəf Yunislinin yaşadığı evinin həyətinə daxil olub.

S.Məmmədov özü ilə gətirdiyi “Sarsılmaz” markalı ov silahı ilə 1967-ci il təvəllüdlü Elxan Zamanova bir dəfə atəş açıb. Həmçinin həmin silahın qundağı və dəyənəklə E.Zamanovun ailə üzvləri Asəf Yunisli və Maniyə Zamanovanı döyərək müxtəlif dərəcəli bədən xəsarətləri yetirib.

Faktla bağlı Xocalı Rayon Polis Şöbəsində cinayət işi başlanıb.