İsraildə ilk dəfə fələstinliləri təmsil edən ərəb partiyası hökumətdə təmsil olunacaq.“Xarici KİV xəbər verir ki, ərəb partiyası İsrailin baş naziri Benyamin Netanyahunun rəqibləri Yeş Atid (Gələcək var) və Yamina Partiyalarının liderliyindəki müxalifət partiyasına qoşulacaq.
Söhbət İsrail vətəndaşı olan fələstinlilərin qurduğu və İsrail parlamentində 4 millət vəkili olan Birləşmiş Ərəb Siyahısından (Raam) gedir. Partiyanın lideri Mənsur Abbas 8 partiyadan ibarət olacaq kolaisiya hökumətinə qatılmaq üçün imza atıb.
Hökumətin etimad səsini qazanarsa, Raam yeni hökumətdə yer alacaq.
M.Abbas ilk dəfə bir ərəb partiyasının hökumətə qatılması ilə bağlı qərar verməyin o qədər də asan olmadığını bildirib:
“Çox sayda müzakirələr var, amma biz hökumətin qurulması üçün yaxşı fürsət olduğuna inanırıq”.
Yeni koalisiya hökumətinin qurulması üçün ən gec 14 iyuna qədər etimad səsini qazanaraq and içməlidir. Əgər yeni koalisiya hökuməti qurularsa, B.Netanyahunun 12 illik baş nazirlik dövrü başa çatacaq.
Xatırladaq ki, bu il martın 23-də İsraildə son 2 ildə 4-cü dəfə erkən parlament seçkiləri keçirilib. Seçkilərdə heç bir partiya hökuməti formalaşdırmaq üçün parlamentdə mütləq çoxluq olan 61 millət vəkilinə çata bilməyib.
