Xocavənd Rayon İcra Hakimiyyətinin başçısı Eyvaz Hüseynov - Prezidentimiz cənab İlham Əliyevin şəhid ailələrinə diqqət və qayğısı daimidir. Müharibə şəraiti davam etsə də, Azərbaycan qüdrətli dövlətə çevrilib. Hələ müharibə şəraitində yaşaya-yaşaya Azərbaycanın hərbi büdcəsi işğalçı Ermənistanın dövlət büdcəsindən 4 dəfə artıqdır. Təkcə bu fakt hər şeyi deyir və əlavə statistik məlumatların göstərilməsinə ehtiyac yaranmır.
Prezident şəhid ailələrinə diqqət və qayğısı davamlı xarakter alıb. Müharibə əlilləri, veteranları və şəhid ailələrinin sosial ehtiyaclarının dövlət tərəfindən ödənilməsi, həmçinin Vətən uğrunda öz canından keçmiş şəhidlərin və Qarabağ müharibəsi əlillərinin övladlarının təhsil haqqından azad edilməsi, eyni zamanda, bu insanların mənzil və avtomobillərlə təmin olunması da çox müsbət haldır.
Prezident İlham Əliyev və birinci xanım Mehriban Əliyeva 2020-ci il iyulun 21-də Bakının Xətai rayonunda şəhid ailələrinə, müharibə əlillərinə mənzillərin və avtomobillərin təqdim olunması bir daha sübut etdi ki, ölkə başçısın diqqət və qayğısı daha da geniş vüsət alır. Prezident İlham Əliyevin əhalinin sosial problemlərinin həllinə xüsusi diqqət və qayğı göstərməsi digər sosial qruplar kimi, əlillərin də həyat şəraitinin yaxşılaşmasına, onların ictimai hüquqlarının bərpa olunmasına şərait yaradıb.
Dövlət siyasətinin mərkəzində vətəndaşlar dayanır. Müqayisə üçün deyə bilərik ki, keçən il şəhid ailələrinə 934 mənzil təqdim edilib. Bu il isə bu rəqəm 1500-ə yüksələrək daha da çox şəhid ailələrini əhatə edib. Bir daha bildirmək istəyirəm ki, şəhid ailələrinə, müharibə əlillərinə dövlət tərəfindən nəzərdə tutulmuş evlərin təqdim edilməsi üçün çox fəal iş aparılır. Bu prosedur dövlət başçısının birbaşa nəzarəti altındadır.
Prezident İlham Əliyev xalqın hər bir nümayəndəsinə diqqət və qayğı göstərir. Azərbaycan xalqı isə hər zaman öz prezidentini dəstəkləyib onun arxasında olduğunu dəfələrlə nümayiş etdirir.

Koronavirusa qarşı mübarizə işində müsbət dinamika müşahidə olunur

Dünyada ən böyük problemə çevrilmiş koronavirus pandemiyasına qarşı qabaqlayıcı tədbirlər davam etdirilir. Bütün dövlətlər qabaqlayıcı tədbirlər görür, virusun təsirinin azaldılması üçün bir sıra addımlar atırlar. İnfeksiyanın yayılma sürətinin qarşısını almaqda belə böyük dövlətlər çətinlik çəkir.

Azərbaycanda əhalinin təhlükəsizliyi və sağlamlığının qorunması üçün təxirəsalınmaz tədbirləri həyata keçirilir. Əhalinin sağlamlığının qorunması istiqamətində mühüm işlər görülür və uğurlu nəticələr əldə olunmaqdadır.

Prezident İlham Əliyev koronavirusla mübarizə sahəsində görülən tədbirlər və sosial-iqtisadi vəziyyətlə bağlı 2020-ci il 6 avqustda keçirdiyi müşavirədəki çıxışında bildirib ki, “Koronavirusa qarşı mübarizə işində müsbət dinamika müşahidə olunur. İyulun 16-dan bu günə qədər bu müsbət dinamika deməyə əsas verir ki, görülmüş bütün tədbirlər vaxtında görülmüş tədbirlərdir. Bu tədbirlər nəticəsində vəziyyət bu günə qədər nəzarət altındadır. İyulun 16-dan bu günə qədər yoluxanların sayı sağalanların sayından xeyli aşağıdır. Bu müsbət dinamika deməyə əsas verir ki, biz koronavirus xəstəliyini bundan sonra da nəzarət altında saxlayacağıq. Artıq üç həftədir ki, bu müsbət dinamika, əlbəttə, bizi çox sevindirir. Prinsip etibarilə ilk günlərdən, bu xəstəlik meydana çıxandan dərhal sonra bütün lazımi qabaqlayıcı tədbirlər görüldü. Bunun nəticəsində biz bu vəziyyətdən az itkilərlə çıxırıq.”

Virusla mübarizədə həkimlərimizin əməyi danılmazdır. Gecə-gündüz bilmədən xəstələrin müalicəsinə çalışan tibb işçilərinin fəaliyyətini yüksək qiymətləndirən Prezident İlham Əliyev bildirib ki, “Məhz həkimlərin yorulmaz fəaliyyəti nəticəsində Azərbaycanda bu xəstəlikdən ölənlərin sayı aşağı səviyyədədir”.

Son günlər də ölkədə xəstəxanaların sayının artırılması və yeni avadanlıqlarla təmin olunması infeksiyaya yoluxmuş xəstələrin müalicəsinin səmərəli təşkili məqsədi daşıyır. Fövqəladə Hallar Nazirliyinin xətti ilə 800 çarpayılıq bir xəstəxana istifadəyə verilib, həmçinin 1300 çarpayılıq xəstəxana isə bu ayın sonuna qədər istifadəyə verilməsi nəzərdə tutulub. Ölkə rəhbərinin müvafiq göstərişi ilə iki Olimpiya İdman Kompleksi müvəqqəti xəstəxanaya çevrilərək hazır vəziyyətə gətirilib. Hal-hazırda modul tipli 9 xəstəxana istismara verilib. Prezident İlham Əliyevin iştirakı ilə Qobustan, İsmayıllı, Qəbələ və Şəki şəhərlərində modul tipli xəstəxanaların açılışı olub. Bu tip müəssisələrin sayı artırılaraq 16-ya çatdırılacaq.

Ölkə Prezidentinin “Biz birlikdə güclüyük!” çağırışı ilə bu təhlükəli infeksiyaya qarşı mübarizədə Azərbaycan xalqı məsuliyyət, yüksək nizam-intizam göstərir və ən başlıcası, milli həmrəyliyə, hər cür fədakarlığa hazır olduğunu nümayiş etdirir. Təhlükəli xəstəliklə mübarizədə dövlətin yanında olmaqla, həyata keçirilən zəruri tədbirləri bütünlüklə dəstəkləyir.