"Microsoft" korporasiyasının qurucusu Bill Qeyts hesab edir ki, ABŞ-da koronavirus infeksiyasına yoluxma sayının yenidən çoxalması testlərin sayının artması ilə əlaqəli deyil.

Azvision.az xəbər verir ki, bu barədə Qeyts "CNN”ə bildirib.

O, ABŞ Prezidenti Donald Trampın və Amerika administrasiyasının digər yüksək vəzifəli şəxslərinin ölkədə yoluxanların sayının artmasının testlərin çoxalması ilə əlaqədar olması barədə səsləndirdiyi fikirlərə münasibət bildirərək deyib: "Xeyr, bu tamamilə səhvdir. Şübhəsiz ki, daha çox sınaq keçirərək, daha çox yoluxma halını tapacaqsınız. Ancaq testləri saxlasanız belə, yoluxma sayı artmaqda davam edəcək".

Qeytsin sözlərinə görə, payızda hakimiyyətin test keçirmə imkanları artacaq.

"Lakin bu, müşahidə etdiyimiz artan yoluxma hallarının səbəbi deyildir. İnfeksiyanın yayılmasına qarşı mübarizə Nyu-York istisna olmaqla, ölkə daxilində sürətlə davam edir. Bu problemə indikindən daha ciddi yanaşmasaq, yoluxma sayı oktyabr-noyabr aylarında yenidən çox yüksək olacaq”.

İş adamı, həmçinin əlavə edib ki, yeni koronavirus üçün peyvəndin yaradılması infeksiyanın yayılmasını dayandıracağına zəmanət vermir.