"Həqiqəti bilən insanlardan hər şeyi soruşa bilərsiniz. "Qarabağ"dan niyə ayrıldığımı onlar sizə deyəcək".

Bu sözləri Qol.az-a eksklüziv açıqlamasında "Qarabağ"ın sabiq hücumçusu Dino Ndlovu deyib. Qış fasiləsində Ağdam təmsilçisini Çinin "Xançjou Qrintaun" klubuna dəyişən Cənubi afrikalı forvard Azərbaycan mətbuatına özü haqda yayılan xəbərlərə münasibət bildirib:

"Bu barədə danışmaq hazırda mənim üçün ən axırıncı işdir. Karyeramda yeni səhifə açmışam. Haqqımda xoş olmayan sözlər deyə bilərlər. Amma mən "Qarabağ"ı çox sevdim".

Bir müddət öncə "Qarabağ"ın kapitanı Rəşad Sadıqovun onunla bağlı səsləndirdiyi fikirlərə də toxunan 27 yaşlı futbolçu "Qarabağ"da qalmaq istədiyini söyləyib: "Əgər o düşünürsə ki, əsl həqiqət bundan ibarətdir, çox gözəl. Amma bayaq da dediyim ki, klubda işləyən bəzi insanlar "Qarabağ"da qalmaq istədiyimi bilirdilər".

“Qurban Qurbanov mətbuata açıqlamasında deyib ki, Ndlovunun ürəyi “Qarabağ”da deyildi və təklif gələn kimi komandadan getmək istədiyini bildirdi. Bu fikrə münasibətiniz necədir” sualına cavabında afrikalı futbolçu səslənən fikirlərin gülməli olduğunu söyləsə də, ona pis təsir etdiyini də gizlətməyib:

"Açığı, belə şeyləri eşidəndə gülməyim gəlir. Amma digər tərəfdən də haqqımda bu cür ifadələr işlədilməsi məni kədərləndirir. Onlar başa düşməlidirlər ki, mən "Qarabağ"ı sevirdim".

Qeyd edək ki, "Qarabağ" Ndlovunu qış transfer pəncərəsində 750 min avroya "Xançjou Qrintaun" klubuna satıb.